കൃഷ്ണഗിരി (വയനാട്): കൃഷ്ണഗിരി ക്രിക്കറ്റ് സ്റ്റേഡിയത്തില്‍ നടക്കുന്ന രഞ്ജി എലൈറ്റ് ഗ്രൂപ്പ് ബി മത്സരത്തില്‍ ജാര്‍ഖണ്ഡിനെതിരേ വിദര്‍ഭക്ക് ബാറ്റിങ് തകര്‍ച്ച. ആദ്യം ബാറ്റു ചെയ്ത വിദര്‍ഭ ഒന്നാം ഇന്നിങ്‌സില്‍ 42 ഓവറില്‍ 105 റണ്‍സിനു എല്ലാവരും പുറത്തായി.
മറുപടി ബാറ്റിങ്ങിനിറങ്ങിയ ജാര്‍ഖണ്ഡ്് ഒന്നാം ദിനം കളി അവസാനിക്കുമ്പോള്‍ ഒരു വിക്കറ്റ് നഷ്ടത്തില്‍ 146 റണ്‍സ് നേടി. ജാര്‍ഖണ്ഡിന് 41 റണ്‍സിന്റെ ഒന്നാം ഇന്നിങ്‌സ് ലീഡുണ്ട്. രണ്ടാം ഓവറില്‍ തന്നെ ഓപണര്‍ വിരാട് സിങിനെ നഷ്ടമായങ്കെിലും ആനന്ദ് സിങ് (58), പ്രത്യുഷ് സിങ് (80)എന്നിവര്‍ പുറത്താകാതെ നിന്നു ജാര്‍ഖണ്ഡിനെ ആദ്യ ദിനം തന്നെ ശക്തമായ നിലയിലേക്ക് നയിച്ചു.
നേരത്തെ ടോസ് നേടിയ ജാര്‍ഖണ്ഡ് വിദര്‍ഭയെ ബാറ്റിങിനയച്ചു. ജാര്‍ഖണ്ഡിനു വേണ്ടി അരങ്ങേറ്റ മത്സരത്തില്‍ തന്നെ മികവ് കാട്ടി ഇടംകൈയന്‍ പേസര്‍ വികാസ് സിങ് നാലു വിക്കറ്റുകള്‍ വീഴ്ത്തി. സ്‌ട്രൈക്ക് ബൗളര്‍ അജയ് യാദവ് മൂന്നു വിക്കറ്റുകള്‍ നേടി. ഏഴാം ഓവറില്‍ ആദ്യ വിക്കറ്റ് നഷ്ടമായ വിദര്‍ഭക്ക്  പിന്നീട് കളിയിലേക്ക് തിരിച്ചുവരാനായില്ല. 20 റണ്‍ നേടിയ രവി ജങ്കിതും 21 റണ്‍ നേടിയ ജീതേഷ് ശര്‍മയുമാണ് ടോപ് സ്‌കോറര്‍മാര്‍.