പള്ളിക്കര: കിഴക്കമ്പലം പോഞ്ഞാശ്ശേരി റൂട്ടില്‍ കിറ്റെക്‌സ് ലിമിറ്റഡിന് സമീപം അമ്പലപ്പടി ബസ് സ്റ്റോപ്പില്‍ ടിപ്പറും സ്വകാര്യ ബസും കൂട്ടിയിടിച്ച് 16 പേര്‍ക്ക് പരുക്ക്. പെരുമ്പാവൂരില്‍ നിന്നും കിഴക്കമ്പലം വഴി ആലുവയിലേക്ക് പോകുന്ന സ്വകാര്യ ബസും, പോഞ്ഞാശ്ശേരിയിലേക്ക് പോകുന്ന ടിപ്പര്‍ ലോറിയുമാണ് കൂട്ടിയിടിച്ചത്.
ബസ് സ്റ്റോപ്പില്‍ നിറുത്തിയിട്ടിരുന്ന ബസിലേക്ക് അമിത വേഗതയില്‍ വന്ന ടിപ്പര്‍ ലോറി ഇടിക്കുകയായിരുന്നുവെന്ന് യാത്രക്കാര്‍ പറഞ്ഞു. പരുക്കേറ്റവരെ   പഴങ്ങനാട് സ്വകാര്യ ആശുപത്രിയില്‍ പ്രവേശിപ്പിച്ചു. ഇതില്‍  13 പേരെ പ്രാഥമിക ചികിത്സ നല്‍കി വിട്ടയച്ചു. ഗുരുതര പരുക്കേറ്റ ഡ്രൈവര്‍ ഉള്‍പ്പെടെ മൂന്ന് പേരെ വിദഗ്ധ ചികിത്സക്കായി വിവിധ സ്വകാര്യ ആശുപത്രിയിലേക്ക് മാറ്റി.