കൊല്ലം:   കഞ്ചാവ് വില്‍പന നടത്തുന്നതിനിടെ പ്രായപൂര്‍ത്തിയാവാത്ത കുട്ടിയെയും യുവാവിനെയും എക്‌സൈസ് സ്‌പെഷ്യല്‍ സ്‌ക്വാഡ് പിടികൂടി.
തൃക്കോവില്‍വട്ടം സ്വദേശിയായ പതിനേഴുകാരന്‍, പുന്തലത്താഴം വാറുതുണ്ടില്‍ വീട്ടില്‍ മിന്നല്‍ എന്നു വിളിക്കുന്ന നൗഫല്‍(21) എന്നിവരാണ്  പിടിയിലായത്. കഴിഞ്ഞ ദിവസം അറസ്റ്റിലായ അജിത്, സുധിന്‍ എന്നിവരില്‍ നിന്നും ലഭിച്ച വിവരങ്ങളനുസരിച്ച് കൊല്ലം എ.സി.പി ജി .രാധാകൃഷ്ണപിള്ളയുടെ നിര്‍ദേശാനുസരണം സി.ഐ ജെ. താജുദ്ദീന്‍കുട്ടിയുടെ നേതൃത്വത്തിലുള്ള സ്‌പെഷ്യല്‍ ഷാഡോ ടീം നടത്തിയ രഹസ്യ നീക്കങ്ങള്‍ക്കൊടുവിലാണ് താഴാംപണ കള്ളുഷാപ്പിന് സമീപമുള്ള വയലില്‍ നിന്നും ഇരുപത് പൊതി കഞ്ചാവുമായി പതിനേഴുകാരനെയും 140 പൊതി കഞ്ചാവുമായി  നൗഫലിനേയും പിടികൂടിയത്.
ഇവര്‍ക്ക് തെങ്കാശിയില്‍ നിന്നും കഞ്ചാവ് എത്തിച്ച് കൊടുക്കുന്നയാളെകുറിച്ച് വ്യക്തമായ സൂചനകള്‍ ലഭിച്ചതായും അന്വേഷണം ആരംഭിച്ചായും എക്‌സൈസ് അറിയിച്ചു.  പതിനേഴുകാരന്‍ പത്താംക്ലാസ് കഴിഞ്ഞ് പഠനം ഉപേക്ഷിച്ച് വെല്‍ഡിങ് ജോലി ചെയ്ത് വരുന്നതിനിടെയാണ് സുഹൃത്തുകളുമായി ചേര്‍ന്ന് കഞ്ചാവ് ഉപയോഗവും പിന്നീട് വിതരണവും ആരംഭിച്ചത്.