മഞ്ചേരി: മെഡിക്കല്‍ കോളജിലെ പ്രീഫാബ് വില്ലകള്‍ നവീകരിച്ചു. കെട്ടിടങ്ങള്‍ക്കു ചുറ്റും മണ്ണൊലിപ്പു തടയുന്ന വിധത്തില്‍ ഭിത്തികള്‍ നിര്‍മിച്ചും അഴുക്കുചാലുകള്‍ കീറിയുമാണ് നവീകരണ പ്രവൃത്തികള്‍ നടത്തിയിരിക്കുന്നത്. കഴിഞ്ഞ വര്‍ഷകാലാരംഭത്തിലാണ് മെഡി.കോളജ് അക്കാദമിക്ക് ബ്ലോക്കിനു സമീപം ചെങ്കുത്തായ ഭാഗത്ത് നിര്‍മിച്ച 12 പ്രീഫാബ് കെട്ടിടങ്ങളുടെ അടിത്തറകള്‍ ശക്തമായ മണ്ണൊലിപ്പിനെ തുടര്‍ന്ന് പൂര്‍ണമായും തകര്‍ന്നുപോയിരുന്നത്.
വിദ്യാര്‍ഥികളുടേയും ഡോക്ടര്‍മാരുടേയും താമസ സൗകര്യങ്ങള്‍ക്കുള്ള ഒരുക്കങ്ങള്‍ നടന്നുവരുന്നതിനിടയിലായിരുന്നു ഇത്. അന്നു എം.സി.ഐ പരിശോധനക്കു മുമ്പായി ധൃതിപ്പെട്ടാണ് വില്ലകളുടെ പ്രവൃത്തികള്‍ പൂര്‍ത്തിയാക്കിയത്. സുരക്ഷിതമായ ചുറ്റുമതിലുകള്‍ കെട്ടാതെ ധൃതിപെട്ടു സ്ഥാപിച്ചതിനെതുടര്‍ന്നാണ് കെട്ടിടങ്ങള്‍ തകര്‍ന്നതെന്ന വിമര്‍ശനമുയര്‍ന്നിരുന്നു.
തുടര്‍ന്ന് കെട്ടിടങ്ങള്‍ക്കു ചുറ്റും ഭിത്തികള്‍ കെട്ടി പ്രിഫാബ് വില്ലകളുടെ തറകള്‍ ശക്തിപ്പെടുത്തി. മെഡിക്കല്‍ കോളജിലെ ഡോക്ടര്‍മാരുടേയും വിദ്യാര്‍ഥികളുടേയും താമസ സൗകര്യങ്ങള്‍ വര്‍ധിപ്പിക്കുന്നതിന്റെ ഭാഗമായാണ് വില്ലകള്‍ സ്ഥാപിച്ചത്. തിരുവനന്തപുരത്ത് ദേശീയ ഗെയിംസിനു വേണ്ടി ഉപയോഗിച്ചിരുന്ന സ്‌പോര്‍ട്‌സ് വില്ലകളാണ് ഇതിനായി ഉപയോഗപ്പെടുത്തിയിരിക്കുന്നത്. ഒരോ വില്ലകളിലും മൂന്ന് ബെഡ് റൂമുകളും ഒരു ഹാളുമാണുള്ളത്. കെട്ടിടങ്ങളുടെ പിറകുവശത്തുള്ള ഏറ്റവും ഉയര്‍ന്ന ഭാഗത്തു വെള്ളം ശേഖരിക്കുന്നതിനായുള്ള മൂന്ന് ടാങ്കുകളും സ്ഥാപിച്ചിട്ടുണ്ട്. നവീകരണ പ്രവൃത്തികള്‍ പൂര്‍ത്തിയായതിനാല്‍ ഇതു വിദ്യാര്‍ഥികള്‍ക്കും അധ്യാപകര്‍ക്കുമായി ഉടന്‍ തുറന്നുകൊടുക്കുമെന്നാണറിയുന്നത്.