വരന്തരപ്പിള്ളി: വീടിനു മുന്നില്‍ റോഡില്‍ നിന്നും പുകവലിച്ചതിന് വരന്തരപ്പിള്ളി പൊലിസ് യുവാവിനെ ക്രൂരമായി മര്‍ദിച്ചു. വേലൂപ്പാടം കലവറക്കുന്നു പുന്നക്കര പോളിന്റെ മകന്‍ അഭിലാഷി(33)നാണ് മര്‍ദനമേറ്റത്. ഇയാളെ പുതുക്കാട് ഗവ. ആശുപത്രിയില്‍ പ്രവേശിപ്പിച്ചു.  കൂടുതല്‍ മികച്ച ചികിത്സക്കായി ഇന്ന് മെഡിക്കല്‍ കോളജ് ആശുപത്രിയില്‍ പ്രവേശിപ്പിക്കാനുള്ള തയാറെടുപ്പിലാണ്. ശനിയാഴ്ച വൈകീട്ട് ആറര മണിയോടെ സ്വന്തം വീടിനു മുന്നില്‍ നിന്ന് പുക വലിച്ചതിനായിരുന്നു എസ്.ഐ എം.ഡി അന്ന അഭിലാഷിനെ പിടികൂടി പൊലിസ് സ്റ്റേഷനില്‍ കൊണ്ടുപോയത്. സ്റ്റേഷനില്‍ എത്തിയ ഉടന്‍ പ്രജീഷ് എന്ന പൊലിസുകാരന്‍ അഭിലാഷിന്റെ ഒരു ചെവി പൊത്തി പിടിച്ചു മറ്റേ ചെകിട്ടില്‍ ശക്തിയായി അടിക്കുകയായിരുന്നു. അടിയേറ്റു ഇരുന്നുപോയ അഭിലാഷിനെതിരേ പൊലിസ്  മര്‍ദനം ആവര്‍ത്തിച്ചു. വീട്ടിലെത്തിയ അഭിലാഷിന്റെ ചെവിട്ടില്‍ നിന്നും ഒരുതരം വെള്ളം ഒളിച്ചിറങ്ങാന്‍ തുടങ്ങിയതിനാല്‍ ആശുപത്രിയിലേക്ക് പ്രവേശിപ്പിക്കുകയായിരുന്നു.