കോഴിക്കോട്: മുന്‍ മുഖ്യമന്ത്രി സി.എച്ച് മുഹമ്മദ് കോയയുടെ സ്മരണാര്‍ഥം മുസ്‌ലിം ലീഗ് കോഴിക്കോട് നോര്‍ത്ത് മണ്ഡലം കമ്മിറ്റി വര്‍ഷംതോറും നല്‍കിവരുന്ന സി.എച്ച് അവാര്‍ഡിന്  ഡോ.പി.എ ഇബ്രാഹിം ഹാജി അര്‍ഹനായതായി സംഘാടകസമിതി ചെയര്‍മാന്‍ പി.എ ഹംസ വാര്‍ത്താസമ്മേളനത്തില്‍ അറിയിച്ചു. ജീവകാരുണ്യ പ്രവര്‍ത്തകന്‍, അലിഗഢ് മുസ്‌ലിം യൂനിവേഴ്‌സിറ്റി കോര്‍ട്ട് അംഗം, ഡോ.എ.പി.ജെ അബ്ദുല്‍ കലാം ശാസ്ത്രസാങ്കേതിക യൂനിവേഴ്‌സിറ്റിയുടെ ഗവേണിങ് ബോര്‍ഡ് മെംബര്‍ തുടങ്ങിയ സ്ഥാനങ്ങള്‍ വഹിക്കുന്ന ഇബ്രാഹിം ഹാജി സി.എച്ച് മുഹമ്മദ് കോയയുടെ ഉറ്റ സുഹൃത്തായിരുന്നു.
18 ന് വൈകിട്ട് നാല് മണിയ്ക്ക് കോഴിക്കോട് ഹോട്ടല്‍ മലബാര്‍ പാലസില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ പുരസ്‌കാരം സമ്മാനിക്കും. പ്രതിപക്ഷനേതാവ് രമേശ് ചെന്നിത്തല, പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി, ആന്ധ്രാപ്രദേശ്, കര്‍ണാടക സംസ്ഥാനങ്ങളിലെ മന്ത്രിമാര്‍ എന്നിവര്‍ ചടങ്ങില്‍ പങ്കെടുക്കും.
വാര്‍ത്താസമ്മേളനത്തില്‍ സംഘാടകസമിതി ജനറല്‍ കണ്‍വീനര്‍ നവാസ് പൂനൂര്‍, കോ-ഓര്‍ഡിനേറ്റര്‍ മലയില്‍ അബ്ദുള്ളകോയ, മുസ്‌ലിം ലീഗ് നോര്‍ത്ത് മണ്ഡലം പ്രസിഡന്റെ എസ്.വി ഹസ്സന്‍ കോയ, ജനറല്‍ സെക്രട്ടറി പി. ഇസ്മാഈല്‍ എന്നിവരും പങ്കെടുത്തു.