കടലിനോട് ചേര്‍ന്നുള്ള പ്രദേശത്ത് ഇടിമിന്നലില്‍ തീഗോളത്തിന് സമാനമായ വസ്തു നിലത്ത് പതിച്ചതായി നാട്ടുകാര്‍
കൊടുങ്ങല്ലൂര്‍: അഴീക്കോട് മുനക്കല്‍ ബീച്ചില്‍ ശക്തമായ ഇടിമിന്നലില്‍ വ്യാപകമായ നാശനഷ്ടങ്ങള്‍. ഇവിടെ നിരവധി വീടുകളിലും, മസ്ജിദു റഹ്മ പള്ളിയിലും വൈദ്യുതോപകരണങ്ങളും മറ്റും കത്തി നശിച്ച നിലയിലാണ്.
ചൊവ്വാഴ്ച രാത്രി എട്ട് മണിയോടയാണ് ശക്തിയായ മിന്നല്‍ ഉണ്ടായത്. കടലിനോട് ചേര്‍ന്നുള്ള പ്രദേശത്ത് ഇടിമിന്നലില്‍ തീഗോളത്തിന് സമാനമായ വസ്തു നിലത്ത് പതിച്ചതായി നാട്ടുകാര്‍ പറയുന്നു. മസ്ജിദു റഹ്മ പള്ളിയില്‍ ഇന്‍വര്‍ട്ടര്‍ അടക്കമുള്ള വൈദ്യുതോപകരണങ്ങള്‍ കത്തിനശിച്ചു. മുനക്കല്‍ വീട്ടില്‍ ഫൈസല്‍, മരത്താന്തറ അലി, മുനക്കല്‍ മുഹമ്മദ്, കളത്തില്‍ കുഞ്ഞുമൊയ്തീന്‍, പുത്തന്‍കടപ്പുറത്ത് സെയ്തുമുഹമ്മദ്, മുനക്കല്‍ സലിം, താന്നിക്കപ്പിള്ളി ആന്റപ്പന്‍, പെയിലിങ്ങല്‍ ബക്കര്‍, മുനക്കല്‍ മുഹമ്മദ്, പെയിലിങ്ങല്‍ ഷിഹാബ്, എന്നിവരുടെ വീടുകളിലെ ടെലിവിഷന്‍, ഫാനുകള്‍, ട്യൂബ് ലൈറ്റുകള്‍, ഫ്രിഡ്ജ്, ഇന്‍വര്‍ട്ടര്‍, എന്നിവയും ചില വീടുകളിലെ വൈദ്യുതി മീറ്റര്‍, സ്വിച്ച് ബോര്‍ഡ്, എന്നിവയും കത്തിനശിച്ച നിലയിലാണ്.
ചില വീടുകളില്‍ ചുമരില്‍ നേരിയ വിള്ളല്‍ വീണ നിലയിലുമാണ്. ഇടിമിന്നലില്‍ തീരദേശത്തെ മുനക്കല്‍ പ്രദേശത്ത് മാത്രം ലക്ഷക്കണക്കിന് രൂപയുടെ നാശനഷ്ടങ്ങള്‍ സംഭവിച്ചിട്ടുണ്ട്.