പേരൂര്‍ക്കട: കേശവദാസപുരത്ത് പിടികൂടിയ തെരുവ്‌നായ്ക്കളെ പിടികൂടിയ സ്ഥലത്തിനുസമീപം ഉപേക്ഷിച്ചതായി പരാതി.
സംഭവത്തില്‍ പ്രതിഷേധം ശക്തമായിരിക്കുകയാണ്. കേശവദാസപുരം സന്തോഷ്‌നഗറിലാണ് തെരുവ്‌നായ്ക്കളെ ഉപേക്ഷിച്ചിരിക്കുന്നത്. വ്യാഴാഴ്ച പുലര്‍ച്ചെ നഗരസഭയുടെ നായ്ക്കളെ പിടികൂടുന്ന വാഹനത്തില്‍നിന്ന് 25ലേറെ നായ്ക്കളെ ഇറക്കിവിട്ടതായി നാട്ടുകാര്‍ തന്നെയാണ് കണ്ടത്. ഇതിനെതുടര്‍ന്ന് നാട്ടുകാര്‍ വാര്‍ഡ് കൗണ്‍സിലര്‍ സ്റ്റെഫിജോര്‍ജിനോട് പരാതിപ്പെട്ടിരുന്നു. ഇവര്‍ ഉടന്‍തന്നെ നഗരസഭയുടെ വെറ്ററിനറി ഡോക്ടറുമായി സംസാരിച്ചെങ്കിലും കൂട്ടമായി നായ്ക്കളെ ഇറക്കിവിട്ട സംഭവമുണ്ടായിട്ടില്ലെന്നും ഇക്കാര്യം പരിശോധിക്കാമെന്നുമാണ് ഇവര്‍ പറഞ്ഞത്. ദിവസങ്ങള്‍ക്കു മുമ്പ് ഇലങ്ങുംവിള പ്രദേശത്തും നായ്ക്കളെ കൂട്ടമായി തുറന്നുവിട്ടതായി ആരോപണമുണ്ടായിരുന്നു.