കരസേനയുടെ എജ്യൂക്കേഷന്‍ കോറില്‍ ഹവില്‍ദാര്‍ തസ്തികയിലേക്ക് അപേക്ഷ ക്ഷണിച്ചു. അവിവാഹിതരായ പുരുഷന്മാര്‍ക്കാണ് അപേക്ഷിക്കാന്‍ അര്‍ഹത. സയന്‍സ്, ആര്‍ട്‌സ് വിഭാഗത്തിലാണ് ഒഴിവുകള്‍. ഒഴിവുകളുടെ എണ്ണം പിന്നീട് അറിയിക്കും. 20നും 25നുമിടയില്‍ പ്രായമുള്ളവരാണ് അപേക്ഷിക്കേണ്ടത്. ഇംഗ്ലീഷിലോ ഹിന്ദിയിലോ പരിജ്ഞാനമുണ്ടായിരിക്കണം.
എഴുത്തുപരീക്ഷ, ശാരീരികക്ഷമതാ പരിശോധന, കായികക്ഷമതാ പരിശോധന, വൈദ്യപരിശോധന എന്നിവയുടെ അടിസ്ഥാനത്തിലായിരിക്കും തെരഞ്ഞെടുപ്പ്. 2017 ഏപ്രില്‍ 30നാണ് എഴുത്തുപരീക്ഷ.

ബിരുദമോ ബിരുദാനന്തര ബിരുദമോ ഉള്ളവര്‍ക്കാണ് അവസരം. ഫിസിക്‌സ്, ബോട്ടണി, കെമിസ്ട്രി, സുവോളജി, മാത്തമാറ്റിക്‌സ്, ഇലക്ട്രോണിക്‌സ്, ബയോളജി, കംപ്യൂട്ടര്‍ സയന്‍സ് എന്നിവയില്‍ ബി.എസ്.സി, ബി.എസ്.സി (ഐ.ടി), ബി.സി.എ, ബി.ഇ, ബി.ടെക്, എം.എസ്.സി, എം.എസ്.സി (ഐ.ടി), എം.സി.എ, എം.ടെക് യോഗ്യതയുള്ളവരാണ് അപേക്ഷിക്കേണ്ടത്.

ഇംഗ്ലീഷ് ലിറ്ററേച്ചര്‍, പൊളിറ്റിക്കല്‍ സയന്‍സ്, ഹിന്ദി ലിറ്ററേച്ചര്‍, ഇക്കണോമിക്‌സ്, ഉര്‍ദു, സൈക്കോളജി, ഹിസ്റ്ററി, ജിയോഗ്രഫി, സോഷ്യോളജി, മാത്തമാറ്റിക്‌സ് എന്നിവയില്‍ ബി.എ, എം.എയുള്ളവര്‍ക്ക് ആര്‍ട്‌സ് വിഭാഗത്തിലേക്ക് അപേക്ഷിക്കാം

പേപ്പര്‍ ഒന്നില്‍ ജനറല്‍ അവേര്‍നസ്, ഇംഗ്ലീഷ് എന്നിവയില്‍നിന്ന് 50 ഒബ്ജക്റ്റീവ് ടൈപ്പ് ചോദ്യങ്ങളാണുണ്ടാകുക. സയന്‍സ് വിഭാഗം തെരഞ്ഞെടുക്കുന്നവര്‍ക്കു പേപ്പര്‍ രണ്ടില്‍ ഫിസിക്‌സ്, കെമിസ്ട്രി, കംപ്യൂട്ടര്‍ സയന്‍സ്, ബയോളജി, മാത്തമാറ്റിക്‌സ് എന്നിവയില്‍നിന്ന് 50 മാര്‍ക്കിന്റെ ചോദ്യങ്ങളുണ്ടാകും. ആര്‍ട്‌സ് വിഭാഗത്തില്‍ ഹിസ്റ്ററി, ജിയോഗ്രഫി, പൊളിറ്റിക്കല്‍ സയന്‍സ്, ഇക്കണോമിക്‌സ്, മാത്തമാറ്റിക്‌സ് എന്നിവയില്‍നിന്നുള്ള ചോദ്യങ്ങളുണ്ടാകും. വിജയിക്കാന്‍ വേണ്ടത് ഓരോ പേപ്പറിലും 20 മാര്‍ക്ക് വീതമാണ്. നെഗറ്റീവ് മാര്‍ക്കിങ് ഉണ്ടായിരിക്കും.

എഴുത്തുപരീക്ഷയില്‍ വിജയിക്കുന്നവര്‍ക്ക് ടീച്ചിങ് ആപ്റ്റിറ്റിയൂഡ് ടെസ്റ്റും അഭിമുഖവുമുണ്ടായിരിക്കും. തെരഞ്ഞെടുക്കപ്പെടുന്നവര്‍ക്ക് ഒരു വര്‍ഷം പരിശീലനം നല്‍കും. ബിരുദം, ബിരുദാനന്തര ബിരുദവും ബി.എഡുമുള്ളവര്‍ക്ക് 5200, 20,200 നിരക്കില്‍ ശമ്പളവും 2,800 ഗ്രേഡ് പേ, 2,000 മിലിട്ടറി സര്‍വിസ് പേ, ഗ്രൂപ്പ് 'എക്‌സ് പേ 1,400 രൂപയും ലഭിക്കും. ഗ്രൂപ്പ് 'വൈ' വിഭാഗത്തിലുള്ള ബിരുദം മാത്രമുള്ളവര്‍ക്ക് 5,200, 20,200 നിരക്കില്‍ ശമ്പളവും 2,800 ഗ്രേഡ് പേ, 2,000 മിലിട്ടറി സര്‍വിസ് പേയും ലഭിക്കും. www.jo-inindanarmy.nic.in എന്ന വെബ്‌സൈറ്റ് വഴി ഓണ്‍ലൈനായാണ് അപേക്ഷിക്കേണ്ടത്. കേരളത്തില്‍നിന്നുള്ള അപേക്ഷകര്‍ക്ക് ബംഗളൂരു ഹെഡ്ക്വാര്‍ട്ടേഴ്‌സില്‍നിന്നായിരിക്കും റിക്രൂട്ട്‌മെന്റ്.
അപേക്ഷിക്കാനുള്ള അവസാന തിയതി: നവംബര്‍ 29.