അമ്പലപ്പുഴ: കാനയിലെ മാലിന്യം രോഗികളെയും പരിചരിക്കാന്‍ നില്‍ക്കുന്നവരെയും ദുരിതത്തിലാക്കുന്നു. വണ്ടാനം മെഡിക്കല്‍ കോളജ് ആശുപത്രി വളപ്പിലെ കാനയില്‍ കെട്ടികിടക്കുന്ന മാലിന്യമാണ് രോഗികളെ വീണ്ടും രോഗഭീഷണിയിലാക്കുന്നത്.
ആലപ്പുഴ വാടയ്ക്കല്‍ ഭാഗത്തുനിന്നും ആരംഭിക്കുന്ന കാപ്പിതോട്ടിലൂടെ ഒഴുകുന്ന മലിനജലം ആശുപത്രി വളപ്പിലെ കാനയിലൂടെ ഒഴുകിയാണ് കാക്കാഴം കാപ്പിതോട്ടില്‍ അവസാനിക്കുന്നത്. എന്നാല്‍ ആശുപത്രിയുടെ വടക്കെ മതില്‍കെട്ടിന് പുറത്ത് സ്ഥിതിചെയ്യുന്ന ലാബുകള്‍, ഹോട്ടലുകള്‍ തുടങ്ങിയ വ്യാപാരസ്ഥാപനങ്ങളില്‍നിന്നും പുറംതള്ളുന്ന മലിനജലവും പ്ലാസ്റ്റിക് കുപ്പികള്‍, പ്ലാസ്റ്റ് കവറുകള്‍ തുടങ്ങിയ പാഴ്‌വസ്തുക്കളുമെല്ലാം ഈ ഭാഗത്തുകൂടി കടന്നുപോകുന്ന കാനയിലാണ് തള്ളുന്നത്.
ഇങ്ങനെ തള്ളുന്ന മാലിന്യങ്ങളും ഓടയിലൂടെ ഒഴുകിയെത്തുന്ന മാലിന്യങ്ങളും തിങ്ങിനിറഞ്ഞ് മലിനജലം ഒഴുകിപ്പോകാതെ കെട്ടികിടന്നാണ് അസഹനീയമായ ദുര്‍ഗന്ധം വമിക്കുന്നത്. കൂടാതെ കൊതുകുകളും, കൂത്താടികളും മുട്ടയിട്ടു പെരുകുന്നതിനാല്‍ വാര്‍ഡുകളില്‍ ചികിത്സയില്‍ കഴിയുന്ന രോഗികളുടെയും ജീവനക്കാരുടെയും ഉറക്കം കെടുത്തുകയാണ്. പകലുപോലും കൊതുകിന്റെ ശല്യം സഹിക്കാനാവാത്ത അവസ്ഥയാണ്.
രോഗികളായി കഴിയുന്നവരുടെ ശരീരമാസകലും കൊതുകു കടിച്ച് ചൊറിഞ്ഞുതടിക്കുന്നു. കൂടാതെ പകര്‍ച്ചപ്പനിയുള്‍പ്പെടെയുള്ള രോഗഭീഷണിയിലുമാണിവര്‍.
വീടുകളിലും പരിസര പ്രദേശത്തും മാലിന്യവും മലിനജലവും കെട്ടികിടന്നാല്‍ പകര്‍ച്ചപ്പനിയുള്‍പ്പെടെയുള്ള രോഗം ഉണ്ടാകുമെന്നും മാലിന്യം നിര്‍മ്മാര്‍ജനം ചെയ്യണമെന്നും ആരോഗ്യവകുപ്പ് അധികാരികള്‍ മുന്നറിയിപ്പ് നല്‍കാറുണ്ട്. എന്നാല്‍ ആശുപത്രിവളപ്പിലെ കാനയില്‍ കെട്ടിക്കിടക്കുന്ന മാലിന്യത്താല്‍ കൊതുകടി മൂലം ജനങ്ങള്‍ക്കുണ്ടാകുന്ന അസ്വസ്ഥതയ്ക്ക് പരിഹാരം കാണാന്‍ ആരോഗ്യവകുപ്പോ ആശുപത്രി അധികാരികളോ ആരുംതന്നെ യാതൊരു നടപടിയും സ്വീകരിക്കുന്നില്ല.
ആശുപത്രിവളപ്പില്‍ മാലിന്യം കണ്ടാല്‍ ഉടന്‍ നീക്കംചെയ്യണമെന്ന് ഒരു മാസം മുമ്പ് ആശുപത്രി സന്ദര്‍ശിച്ച ആരോഗ്യമന്ത്രി ആശുപത്രി അധികാരികള്‍ക്ക് നിര്‍ദ്ദേശം നല്‍കിയിരുന്നു. എന്നാല്‍ ഇതൊന്നും ഉത്തരവാദിത്വപ്പെട്ടവര്‍ അറിഞ്ഞതായി നടിക്കുന്നില്ല. സാധാരണക്കാരായ രോഗികളുടെയും പരിസരവാസികളുടെയും ജീവന് ഭീഷണിയാകുന്ന മാലിന്യപ്രശ്‌നത്തിന് ഉടന്‍ പരിഹാരം കാണണമെന്ന ആവശ്യം ശക്തമായിരിക്കുകയാണ്.