കല്‍പ്പറ്റ: മുട്ടില്‍ വയനാട് മുസ്‌ലിം യതീംഖാന സുവര്‍ണജൂബിലി പ്രഖ്യാപനസമ്മേളനം നാളെ മുട്ടില്‍ യതീംഖാന കാംപസില്‍ നടക്കുമെന്ന് ഭാഹവാഹികള്‍ വാര്‍ത്താസമ്മേളനത്തില്‍ അറിയിച്ചു. നാളെ വൈകിട്ട് നാലിന് പാണക്കാട് സയ്യിദ് ഹൈദരലി ശിഹാബ് തങ്ങള്‍ ജൂബിലി ആഘോഷത്തിന്റെ പ്രഖ്യാപനം നടത്തും.
ഡബ്ല്യു.എം.ഒ ഖത്തര്‍ ചാപ്റ്റര്‍ നിര്‍മിച്ചു നല്‍കുന്ന സയ്യിദ് അബ്ദുറഹ്മാന്‍ ബാഫഖി മാന്‍ഷന്റെ ഉദ്ഘാടനവും തങ്ങള്‍ നിര്‍വഹിക്കും. എം.പിമാരായ എം.ഐ ഷാനവാസ്, എം.പി വീരേന്ദ്രകുമാര്‍, എം.എല്‍.എമാരായ സി.കെ ശശീന്ദ്രന്‍, ഐ.സി ബാലകൃഷ്ണന്‍, ഒ.ആര്‍ കേളു, സി മമ്മൂട്ടി, കെ.എം ഷാജി, കേരള ഹജ്ജ് കമ്മിറ്റി ചെയര്‍മാന്‍ കോട്ടുമല ബാപ്പുമുസ്‌ലിയാര്‍, സമസ്ത കേന്ദ്ര മുശാവറ അംഗങ്ങളായ കെ.ടി ഹംസ മുസ്‌ലിയാര്‍, വി മൂസക്കോയ മുസ്‌ലിയാര്‍, മുസ്‌ലിംലീഗ് അഖിലേന്ത്യാ ജനറല്‍ സെക്രട്ടറി പ്രൊഫ. ഖാദര്‍ മൊയ്തീന്‍, ട്രഷറര്‍ പി.കെ കുഞ്ഞാലിക്കുട്ടി, ജില്ലാ പ്രസിഡന്റ് പി.പി.എ കരീം സംസാരിക്കും.
സുവര്‍ണ ജൂബിലിയുടെ ഭാഗമായി 12 പ്രൊജക്ടുകള്‍ നടപ്പിലാക്കും. ദേശീയ വിദ്യാഭ്യാസ സെമിനാര്‍, ഡബ്ല്യു.എം.ഒ ഫാമിലി മീറ്റ്, ആത്മീയ പ്രഭാഷണം, പൂര്‍വ വിദ്യാര്‍ഥി സംഗമം, പ്രവാസി സംഗമം, ചരിത്രസ്മരണിക പ്രകാശനം, മതസൗഹാര്‍ദ സദസ്സ്, മഹല്ല് ഭരണ സാരഥീസംഗമം, വയോജന സ്‌നേഹസംഗമം എന്നിവയും നടക്കും.
തസവ്വുഫ് പണ്ഡിത വിദ്യാര്‍ഥി സംഗമം സുല്‍ത്താന്‍ ബത്തേരി ദാറുല്‍ ഉലൂം അറബിക് കോളജിലും സനദ് ദാന സമ്മേളനം കൂളിവയല്‍ ഇമാം ഗസ്സാലി അക്കാദമിയിലും ശാസ്ത്രശിബിരം പിണങ്ങോട് ഹയര്‍സെക്കന്‍ഡറി സ്‌കൂളിലും മീഡിയ സെമിനാര്‍ ഡബ്ല്യു.എം.ഒ ആര്‍ട്‌സ് ആന്‍ഡ് സയന്‍സ് കോളജിലും വനിതാ സമ്മേളനം അല്ലാന വഫിയ കോളജിലും കുരുന്നുകൂട്ടം പന്തിപ്പൊയില്‍ ടി.കെ.എം ഓര്‍ഫനേജിലും ഖുര്‍ആന്‍ സെമിനാര്‍ കുഞ്ഞോം ശരീഫ ഫാത്തിമ തഹ്ഫീധുല്‍ ഖുര്‍ആന്‍ സെന്ററിലും നടക്കും.
വാര്‍ത്താസമ്മേളനത്തില്‍ യതീംഖാന പ്രസിഡന്റ് കെ.കെ അഹമ്മദ് ഹാജി, ട്രഷറര്‍ പി.പി അബ്ദുല്‍ ഖാദര്‍, വൈസ് പ്രസിഡന്റുമാരായ പി.കെ അബൂബക്കര്‍, എം.കെ അബൂബക്കര്‍ ഹാജി, ജോയിന്റ് കണ്‍വീനര്‍ കെ അഹമ്മദ് മാസ്റ്റര്‍, ഖത്തര്‍ വെല്‍ഫെയര്‍ കമ്മിറ്റി സെക്രട്ടറി കെ അബ്ദുറഹ്്മാന്‍, പി.കെ മുസ്തഫ എന്നിവര്‍ പങ്കെടുത്തു.