നേമം: നിയന്ത്രണം വിട്ടു മറിഞ്ഞ ബൈക്കില്‍ നിന്നും റോഡില്‍ വീണ യാത്രികന്‍ പുറകില്‍ നിന്നും വരികയായിരുന്ന ലോറി കയറി മരിച്ചു.
ബാലരാമപുരം ആര്‍.സി തെരുവില്‍ തോട്ടത്തുവിളാകം എം.ജെ.ഭവനില്‍ മിദോഷ് മില്‍ട്ടന്‍ (25) ആണ് മരിച്ചത്. ഇന്നലെ ഉച്ചയ്ക്ക് 1.30 ന് പ്രാവച്ചമ്പലത്തിനു സമീപത്തായിരുന്നു അപകടം . അമിത വേഗത്തിലായിരുന്ന ബൈക്ക് നിയന്ത്രണം തെറ്റി മറിയുകയും പുറകിലിരുന്ന മിദോഷ് തെറിച്ച് റോഡില്‍ വീഴുകയുമായിരുന്നു.
തിരുവനന്തപുരം ഭാഗത്തുനിന്നും ബാലരാമപുരത്തേയ്ക്ക് വരികയായിരുന്നു ബൈക്ക് യാത്രികര്‍. തൊട്ട് പിറകില്‍ നിന്നും വരികയായിരുന്ന ലോറി മിദോഷിന്റെ ദേഹത്തിലൂടെ കയറിയിറങ്ങി. തല്‍ക്ഷണം മരിച്ചു.
ബൈക്ക് ഓടിത്തിരുന്ന നെയ്യാറ്റിന്‍കര സ്വദേശി നന്ദു അത്ഭുതകരമായി രക്ഷപ്പെട്ടു. മിദോഷിന്റെ മൃതദേഹം മെഡിക്കല്‍ കോളേജ് ആശുപത്രി മോര്‍ച്ചറിയില്‍. ട്രാഫിക് പൊലിസ് കേസെടുത്തു.