കൊട്ടാരക്കര: പ്രൈവറ്റ് ബസ്റ്റ് സ്റ്റാന്റിന്റെ ദുരവസ്ഥ പരിഹരിക്കാന്‍ നഗരസഭ അടിയന്തര നടപടികള്‍ സ്വീകരിച്ചില്ലെങ്കില്‍ ഇനിയൊരു മുന്നറിയിപ്പില്ലാതെ സ്റ്റാന്റ് ബഹിഷ്‌കരിക്കുമെന്ന് ജില്ലാ പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍.
ഇത് സംബന്ധിച്ച് അവര്‍ ജില്ലാ കലക്ടര്‍ക്ക് പരാതി നല്‍കി. മാലിന്യം കാരണം സ്റ്റാന്റില്‍ ദുര്‍ഗന്ധം രൂക്ഷമാണ്. ബസ് ജീവനക്കാര്‍ക്കും യാത്രക്കാര്‍ക്കും മൂക്ക് പൊത്താതെ സ്റ്റാന്റില്‍ പ്രവേശിക്കാന്‍ കഴിയാത്ത സ്ഥിതി. പൊതുശൗചാലയമില്ലാത്തതിനാല്‍ ആളുകള്‍ ബസുകളുടെ മറവിലും മറ്റുമാണ് പ്രാഥമികകാര്യങ്ങള്‍ നടത്തുന്നത്. പുതിയ ശൗചാലയത്തിന്റെ നിര്‍മ്മാണം മുടങ്ങിയിട്ട് രണ്ട് വര്‍ഷമായി. ഇതുവരെയും പൂര്‍ത്തിയായിട്ടില്ല. സ്റ്റാന്റിനുള്ളിലെ റോഡ് കുണ്ടും കുഴിയുമായിട്ട് മാസങ്ങള്‍ പിന്നിട്ടു. ഒരു ബസിന് ദിനംപ്രതി 20 രൂപാ വച്ച് നഗരസഭ ഈടാക്കുന്നുമുണ്ട്. പലതവണ നഗരസഭയോട് പരാതിപ്പെട്ടിട്ടും ഒരു നടപടിയും ഉണ്ടായിട്ടില്ലെന്ന് അസോസ്സിയേഷന്‍ ഭാരവാഹികള്‍ പറഞ്ഞു.