കണ്ണൂര്‍: രാജ്യത്ത് ബി.ജെ.പിയെക്കാള്‍ പ്രശ്‌നമാകുന്നതും അപകടകാരിയാകുന്നതും പ്രാദേശിക കക്ഷികളാണെന്ന് മഹാരാഷ്ട്ര മുന്‍ ഗവര്‍ണര്‍ കെ ശങ്കരനാരായണന്‍. കണ്ണൂര്‍ ജവഹര്‍ ഓഡിറ്റോറിയത്തില്‍ സി.എം.പിയുടെ (സി.പി ജോണ്‍ വിഭാഗം) എം.വി രാഘവന്‍ അനുസ്മരണം ഉദ്ഘാടനം ചെയ്യുകയായിരുന്നു അദ്ദേഹം. വിവിധ സംസ്ഥാനങ്ങള്‍ ഭരിക്കുന്ന പ്രാദേശിക പാര്‍ട്ടികള്‍ക്ക് നയവും നിലപാടും തോന്നുംപോലെയാണ്. കോണ്‍ഗ്രസിനും ഇടതുപക്ഷത്തിനും രാജ്യത്തെ സംബന്ധിക്കുന്ന കാര്യങ്ങളില്‍ കൃത്യമായ നിലപാടും നയവുമുണ്ട്. എന്നാല്‍ പ്രാദേശിക പാര്‍ട്ടികള്‍ക്ക് അവര്‍ക്കു ഭരണം നിലനിര്‍ത്താന്‍ വേണ്ടി മാത്രമാണ് നിലപാട്.
പ്രാദേശിക പാര്‍ട്ടികളുടെ സ്വാധീനം കുറക്കാനും വര്‍ഗീയ ഫാഷിസത്തിനുമെതിരേ ഒരു പൊതു അജണ്ട നിശ്ചയിച്ച് ഇടതുപക്ഷവും കോണ്‍ഗ്രസ് നേതൃത്വത്തിലുള്ള വലതു മുന്നണിയും ഒന്നിക്കണം. രാജ്യത്തെ ഇടതുപക്ഷമൊന്നാകെ പൊതു പ്ലാറ്റ്‌ഫോമില്‍ ഒന്നിച്ചു നില്‍ക്കുന്നതാണ് രാജ്യത്തിനു നല്ലത്.
ഇതൊക്കെ സാധ്യമാവുമെങ്കിലും താനിരിക്കുന്ന കസേര ഇളകരുതെന്ന ചിലരുടെ നിര്‍ബന്ധ ബുദ്ധിയാണ് കാര്യങ്ങളുടെ സുഗമമായ നടത്തിപ്പിന് തടസമെന്നും ശങ്കരനാരായണന്‍ പറഞ്ഞു.
കോണ്‍ഗ്രസ് ദേശീയതലത്തില്‍ ഒരുപാട് തിരുത്തലുകള്‍ വരുത്താനുണ്ട്. ജനങ്ങളുടെ ആവശ്യങ്ങള്‍ക്കൊത്ത് പാര്‍ട്ടിയെ അടിമുടി മാറ്റണം. മാര്‍ക്‌സിസ്റ്റ്-ലെനിനിസ്റ്റ് വഴിയില്‍ അധിഷ്ഠിതമായ ജീവിതമായിരുന്നു എം.വി രാഘവന്റേത്. ഹൃദയത്തിന്റെ അടിത്തട്ടില്‍ നിന്നാണ് അദ്ദേഹം ജനങ്ങളെയും സഹപ്രവര്‍ത്തകരെയും സ്‌നേഹിച്ചത്. എം.വി.ആര്‍ സി.പി.എം വിട്ടുപോകുമെന്ന് ഒരിക്കലും പ്രതീക്ഷിച്ചില്ലെന്നും അദ്ദേഹം പറഞ്ഞു. ജില്ലാ സെക്രട്ടറി സി.എ അജീര്‍ അധ്യക്ഷനായി.
സമകാലിക ഇന്ത്യയില്‍ വര്‍ഗീയതക്കെതിരേ എന്ന വിഷയത്തില്‍ ഹമീദ് ചേന്ദമംഗലൂര്‍ പ്രഭാഷണം നടത്തി. കെ.പി.സി.സി സെക്രട്ടറി സതീശന്‍ പാച്ചേനി, എ.പി.കെ രാഘവന്‍, മുസ്‌ലിം ലീഗ് നേതാവ് വി.പി വമ്പന്‍, എം.വി ഗിരീഷ് കുമാര്‍, പി സുനില്‍ കുമാര്‍ സംസാരിച്ചു.