മെൽബൺ: ബോർഡർ ഗവാസ്‌കർ ട്രോഫിയിലെ നാലാം ടെസ്റ്റിൽ ഒന്നാം ഇന്നിങ്സിൽ തകർപ്പൻ പ്രകടനം നടത്തി നിതീഷ് കുമാർ റെഡ്ഢി. അർദ്ധ സെഞ്ച്വറി നേടിയാണ് നിതീഷ് മെൽബണിൽ തിളങ്ങിയത്. മെൽബണിൽ നടക്കുന്ന ടെസ്റ്റ് മത്സരത്തിൽ ഏഴാം നമ്പറിൽ ഇറങ്ങി അർദ്ധ സെഞ്ച്വറി നേടുന്ന ഏറ്റവും പ്രായം കുറഞ്ഞ താരമായും നിതീഷ് കുമാർ റെഡ്ഢി മാറി. 21 വയസും 214 ദിവസവും പ്രായമുള്ളപ്പോൾ ആണ് നിതീഷ് ഇത്തരത്തിലൊരു നേട്ടം തന്റെ പേരിലാക്കി മാറ്റിയത്. 

ഇതിനു മുമ്പ് ഇത്തരത്തിലൊരു നേട്ടം പിറവിയെടുത്തത് 1931ൽ ആയിരുന്നു. മെൽബണിൽ നടന്ന മത്സരത്തിൽ സൗത്ത് ആഫ്രിക്കൻ താരം കെൻ വിജോയിൻ ആണ് ഏഴാം നമ്പറിൽ ഇറങ്ങി ഫിഫ്റ്റി നേടിയിരുന്നത്. 21 വയസും 231 ദിവസവും പ്രായമുള്ളപ്പോൾ ആണ് കെൻ വിജോയിൻ ഈ നേട്ടം സ്വന്തമാക്കിയിരുന്നത്. ഇപ്പോൾ നീണ്ട 93 വർഷങ്ങൾക്ക് ശേഷം ഈ റെക്കോർഡ് നിതീഷ് കുമാർ റെഡ്ഢി തന്റെ പേരിലാക്കിയിരിക്കുകയാണ്. 

ഇന്ത്യക്കായി യശ്വസി ജെയ്‌സ്വാളും അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. 118 പന്തിൽ 82 റൺസ് ആണ് ജെയ്‌സ്വാൾ നേടിയത്. 11 ഫോറുകളും ഒരു സിക്സുമാണ് താരം നേടിയത്. വിരാട് കോഹ്‌ലി 86 പന്തിൽ 36 റൺസും കെ എൽ രാഹുൽ 42 പന്തിൽ 24 റൺസും നേടി. 

ആദ്യ ഇന്നിങ്സിൽ ഓസ്‌ട്രേലിയ 474 റൺസാണ് നേടിയത്. സ്റ്റീവൻ സ്മിത്തിന്റെ സെഞ്ച്വറി കരുത്തിലാണ് ഓസീസ് മികച്ച സ്കോർ സ്വന്തമാക്കിയത്. 197 പന്തിൽ 140 റൺസാണ് സ്മിത്ത് നേടിയത്. 13 ഫോറുകളും മൂന്നു സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്.  മാർനസ് ലബുഷാനെ 72, സാം കോൺസ്റ്റാസ് 60, ഉസ്മാൻ ഖവാജ 57 റൺസും നേടി.