കണ്ണൂര്‍: മൂക്കില്‍ ദശവളര്‍ച്ചയെ തുടര്‍ന്ന് കണ്ണൂര്‍ മെഡിക്കല്‍ കോളജില്‍ ശസ്ത്രക്രിയ നടത്തിയ യുവതിയുടെ ഒരു കണ്ണിന്റെ കാഴ്ച നഷ്ടപ്പെട്ടതായി പരാതി. അഞ്ചരക്കണ്ടി മായാങ്കണ്ടി ഹൗസില്‍ രസ്ന(30)യുടെ വലത് കണ്ണിന്റെ കാഴ്ചയാണ് നഷ്ടപ്പെട്ടത്. സംഭവത്തില്‍ മുഖ്യമന്ത്രിക്കും ആരോഗ്യമന്ത്രിക്കും കുടുംബം പരാതി നല്‍കി. 

കഴിഞ്ഞ ഒക്ടോബര്‍ പത്തിനാണ് മൂന്ന് മണിക്കൂറോളം നീണ്ടുനിന്ന സര്‍ജറി ലോക്കല്‍ അനസ്ത്യേഷ നല്‍കി നടത്തിയത്. സര്‍ജറി കഴിഞ്ഞപ്പോള്‍ വലത് കണ്ണിന് കാഴ്ചയുണ്ടായിരുന്നില്ല. എന്നാല്‍ ഇത് നീര്‍ക്കെട്ടാണെന്നും രണ്ടുദിവസം കൊണ്ട് ശരിയാകുമെന്നും ഡോക്ടര്‍മാര്‍ പറഞ്ഞു. കണ്ണിന്റെ ഡോക്ടറെ കാണിക്കാനും നിര്‍ദേശിച്ചു. കണ്ണൂരിലെ സ്വകാര്യ ആശുപത്രിയിലെ പരിശോധനയില്‍ റെറ്റിനയിലേക്ക് രക്തം പോകുന്ന ഞരമ്പിന് സര്‍ജറി സമയത്ത് ക്ഷതമേറ്റതായി കണ്ടെത്തി. ഞരമ്പില്‍ രക്തം കട്ടപിടിച്ചതിനാലാണ് കാഴ്ചയില്ലാത്തതെന്നും വ്യക്തമായി. 

വീണ്ടും മെഡിക്കല്‍ കോളജിലെത്തിയ രസ്‌നയ്ക്ക് രക്തം കട്ടപിടിച്ചത് അലിയിക്കാനെന്ന് പറഞ്ഞ് കുത്തിവയ്പ് നല്‍കി. രണ്ടാഴ്ചക്കുള്ളില്‍ കാഴ്ച തിരിച്ച് ലഭിക്കുമെന്നും പറഞ്ഞു. എന്നാല്‍ മാറ്റമില്ലാത്തതിനാല്‍ കോയമ്പത്തൂരിലെ സ്വകാര്യ കണ്ണാശുപത്രിയിലെത്തി. പരിശോധനയില്‍ കണ്ണിന്റെ കാഴ്ച പൂര്‍ണമായും നഷ്ടപ്പെട്ടുവെന്നും ഞരമ്പ് ചികിത്സിച്ച് പഴയ രൂപത്തില്‍ ഭേദമാക്കിയെടുക്കാന്‍ പറ്റാത്ത സ്ഥിതിയിലാണെന്നും കണ്ടെത്തി. 

രസ്ന അക്ഷയ കേന്ദ്രത്തിലാണ് ജോലി ചെയ്യുന്നത്. ഒരു കണ്ണിന് കാഴച നഷ്ടമായതോടെ ജോലി ചെയ്യാന്‍ പ്രയാസമനുഭവിക്കുകയാണ്. ഇതേക്കുറിച്ച് മെഡിക്കല്‍ കോളജ് അധികൃതരോട് സംസാരിച്ചുവെങ്കിലും തീര്‍ത്തും മോശമായാണ് പ്രതികരിച്ചതെന്ന് രസ്നയുടെ ബന്ധുക്കള്‍ പറയുന്നു.