എടച്ചേരി: കളിവണ്ടി മുതല്‍ ചിത്രപുസ്തകങ്ങള്‍ വരെയുള്ള കളിപ്പാട്ടങ്ങളും പഠനോപകരണങ്ങളുമായി എന്‍.എസ്.എസ് ടീമെത്തിയപ്പോള്‍ കൊച്ചുകൂട്ടുകാര്‍ ആവേശത്തിലായി. കടമേരി ആര്‍.എ.സി ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് അംഗങ്ങളാണ് സ്‌കൂളിനടുത്ത കടമേരി അങ്കണവാടി വിദ്യാര്‍ഥികള്‍ക്ക് കൈനിറയെ സമ്മാനങ്ങളുമായി എത്തിയത്. കളിപ്പാട്ട വിതരണം ആയഞ്ചേരി ഗ്രാമപഞ്ചായത്ത് പ്രസിഡന്റ് എം.എം നഷീദ ടീച്ചര്‍ വാര്‍ഡ് മെമ്പര്‍ ഖൗല ഗഫൂറിന് നല്‍കി ഉദ്ഘാടനം ചെയ്തു. എം.വി അബ്ദുറഹ്മാന്‍ മാസ്റ്റര്‍ അധ്യക്ഷനായി. കുഞ്ഞമ്മദ് മാസ്റ്റര്‍, മുഹമ്മദ് സലീം അടുക്കത്ത്, അഷ്‌റഫ് ചാത്തോത്ത്, മഠത്തില്‍ മീത്തല്‍ അബ്ദുല്ല, ജയശ്രീ കടമേരി, മുഹമ്മദ് എ.ആര്‍. നാജിയ, മേഘ സൈദ്, ശംനാദ്, അന്നത്ത്, സഹല, സഹ്‌റ ഫാത്തിമ നേതൃത്വം നല്‍കി.