മുക്കം: മുക്കം പഴയ ബസ് സ്റ്റാന്‍ഡിലെ മൂത്രപ്പുര അടച്ചു പൂട്ടിയത് നിരവധി പേര്‍ക്ക് ദുരിതമാവുന്നു. യാതൊരു മുന്നറിയിപ്പുമില്ലാതെയാണ് കഴിഞ്ഞ ദിവസം മൂത്രപ്പുര അടച്ചു പൂട്ടിയത്. ഇതോടെ ബസ് സ്റ്റാന്‍ഡിലെത്തുന്ന നൂറ് കണക്കിന് യാത്രക്കാരും ബസ് ഓട്ടോ തൊഴിലാളികളും ദുരിതത്തിലായി. ടോയ്‌ലറ്റിന്റെ ടാങ്ക് നിറഞ്ഞതാണ് അടച്ചുപൂട്ടാന്‍ കാരണമെന്നാന്ന് അധികൃതര്‍ പറയുന്നത്.
ആറ് മാസം മുന്‍പ് ലക്ഷങ്ങള്‍ മുടക്കി നവീകരിച്ച മൂത്രപ്പുരയാണ് ടാങ്ക് നിറഞ്ഞതായി പറഞ്ഞ് വീണ്ടും അടച്ച് പൂട്ടിയത്. മുക്കത്തെത്തുന്ന യാത്രക്കാരില്‍ 80 ശതമാനവുമെത്തുന്നത് പഴയ സ്റ്റാന്റിലാണ് എന്നതിനാല്‍ തന്നെ ഈ മൂത്രപ്പുര നിരവധി പേര്‍ക്ക് അനുഗ്രഹമായിരുന്നു. മൂത്രപ്പുര ഉടന്‍ തുറന്ന് പ്രവര്‍ത്തിക്കാന്‍ നടപടി സ്വീകരിക്കണമെന്നാണ് യാത്രക്കാരുടെ ആവശ്യം.