നെടുമ്പാശ്ശേരി: ഹോം സ്റ്റേയില്‍ അതിക്രമിച്ചു കയറി നാശനഷ്ടം വരുത്തിയ കേസിലെ രണ്ട് പ്രതികളെ ചെങ്ങമനാട് പൊലിസ് അറസ്റ്റ് ചെയ്തു.
പെരിയാറിന്റെ തീരത്തുള്ള ദേശം തലക്കൊള്ളി പേള്‍സ് ഹോം സ്റ്റേ കോമ്പൗണ്ടില്‍ അതിക്രമിച്ചു കയറി നാശനഷ്ടങ്ങള്‍ വരുത്തിയ  അടുവാശ്ശേരി സ്വദേശി തൂപ്പേലില്‍ വിപിന്‍(39), ദേശം തലക്കൊള്ളി സ്വദേശി ഊത്രയില്‍ അനൂപ്( 34), എന്നിവരെയാണ് എസ്.ഐ കെ.ജി ഗോപകുമാര്‍ അറ്റസ്റ്റ് ചെയ്തത്. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.
കേസില്‍ 2 പേര്‍ കൂടി പിടിയിലാകാനുണ്ട്. ഇവര്‍ ഒളിവിലാണ്. നവംബര്‍ ആറിന് രാത്രി പ്രതികള്‍ നാല് പേരും കൂടി ഈ സ്ഥാപനത്തില്‍ അതിക്രമിച്ചു കയറി ബോട്ട് ഷെഡ് കത്തിക്കുകയും, വാഴ മുതലായ കാര്‍ഷിക വിളകള്‍ വെട്ടിനശിപ്പിക്കുകയും, ഫാന്‍സി പ്രതിമകള്‍ തകര്‍ക്കുകയും ചെയ്‌തെന്നാണ് കേസ്.
ഒരു ലക്ഷം രൂപയുടെ നഷ്ടമാണ് കണക്കാക്കിയിട്ടുള്ളത്. ഹോം സ്റ്റേ ഉടമയോടുള്ള വ്യക്തിവൈരാഗ്യമാണ് അക്രമത്തിനു കാരണമെന്ന് പൊലിസ് പറഞ്ഞു.