റിയാദ്: സഊദി ആരോഗ്യ മേഖലയില്‍ രണ്ടു ലക്ഷത്തോളം തൊഴിലുകള്‍ സ്വദേശിവത്കരിക്കുന്നു. നിലവില്‍ സര്‍ക്കാര്‍, സ്വകാര്യ ആശുപത്രികളിലും അനുബന്ധ മേഖലകളിലും തൊഴിലെടുക്കുന്ന രണ്ടുലക്ഷത്തോളം വിദേശികള്‍ക്ക് പകരമായി സ്വദേശികളെ പരിശീലനം കൊടുത്ത് മുന്നില്‍കൊണ്ടുവരാനാണ് ആരോഗ്യ മന്ത്രാലയത്തിന്റെ സഹകരണത്തോടെ തൊഴില്‍ സാമൂഹിക മന്ത്രാലയം ലക്ഷ്യമിടുന്നത്.
ഇതിനായി ആരോഗ്യ മേഖലയിലെ വിവിധ കോഴ്‌സുകളില്‍ പ്രവേശനം നേടുന്ന വിദ്യാര്‍ഥികളുടെ എണ്ണം വര്‍ധിപ്പിക്കുന്നതിനും  തൊഴില്‍ പരിശീലനത്തില്‍ ഗുണമേന്‍മ ഉറപ്പുവരുത്തുന്നതിനും പദ്ധതി തയാറാക്കുന്നുണ്ട്. ആരോഗ്യ മേഖലയില്‍ തൊഴില്‍ പരിശീലന പദ്ധതി വ്യാപിപ്പിക്കാനും സ്വകാര്യ പൊതുമേഖലാ സ്ഥാപനങ്ങള്‍ തമ്മില്‍ പങ്കാളിത്തം സ്ഥാപിക്കാനും പദ്ധതിയിലൂടെ മന്ത്രാലയം ലക്ഷ്യം വയ്ക്കുന്നു.
ടൂറിസം മേഖലയിലും വരും വര്‍ഷങ്ങളില്‍ ലക്ഷക്കണക്കിന് തൊഴിലവസരങ്ങള്‍ ഉണ്ടാവുമെന് ടൂറിസം മേഖലാ മാനവശേഷി വികസന കേന്ദ്രം ഡയറക്ടര്‍ ജനറല്‍ നാസിര്‍ അല്‍ നംശിയും പറഞ്ഞു.
രാജ്യത്ത് ഏറ്റവും കൂടുതല്‍ തൊഴിലവസരങ്ങള്‍ സൃഷ്ടിക്കപ്പെടുന്നത് വിനോദ സഞ്ചാര മേഖലയിലാണ്. ഏറ്റവും കൂടുതല്‍ സ്വദേശിവത്കരണം നടത്തിയ രണ്ടാമത്തെ മേഖലയും ഇതാണ്. ടൂറിസം മേഖലയിലെ സ്വദേശിവത്കരണം 28 ശതമാനത്തിലും കൂടുതലാണ്. 2020 ഓടെ ടൂറിസം മേഖലയില്‍ 18 ലക്ഷത്തോളം പേര്‍ക്ക് തൊഴില്‍ ലഭിക്കുമെന്നാണ് അധികൃതരുടെ പ്രതീക്ഷ.