യാങ്കൂണ്‍: മ്യാന്‍മറില്‍ മൂന്ന് റോഹിംഗ്യന്‍ ഗ്രാമങ്ങള്‍ സൈന്യം അഗ്‌നിക്കിരയാക്കി. സൈനിക ഹെലികോപ്ടറിലെത്തിയാണ് ആക്രമണം നടത്തിയത്.
രണ്ട് സൈനികരും ആറു റോഹിംഗ്യകളും കൊല്ലപ്പെട്ടതായി മ്യാന്‍മര്‍ ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. ഹെലികോപ്ടര്‍ ഉപയോഗിച്ചുള്ള ആക്രമണം സര്‍ക്കാരും സ്ഥിരീകരിച്ചു.
വടക്കന്‍ മേഖലയിലെ റാഖിനെ സംസ്ഥാനത്തെ ഗ്രാമങ്ങളാണ് കത്തിച്ചത്.
റോഹിംഗ്യകള്‍ക്ക് സ്വാധീനമുള്ള മേഖലയാണിത്. കത്തിക്കരിഞ്ഞ ഗ്രാമങ്ങളുടെ ചിത്രങ്ങള്‍ മനുഷ്യാവകാശ സംഘങ്ങളാണ് പുറത്തുവിട്ടത്. 430 ലേറെ വീടുകള്‍ പൂര്‍ണമായും കത്തിനശിച്ചു.
കഴിഞ്ഞ ഒക്ടോബര്‍ 22 നും നവംബര്‍ 10 നും ഇടയില്‍ പകര്‍ത്തിയ ഗ്രാമത്തിന്റെ ഉപഗ്രഹ ചിത്രങ്ങളും പുറത്തുവന്നു.
സൈനികര്‍ കഴിഞ്ഞ മാസം റോഹിംഗ്യകള്‍ക്ക് നേരെ വീണ്ടും കലാപം അഴിച്ചുവിട്ടിരുന്നു.
ഇതിനു പിന്നാലെയാണ് ഗ്രാമം സൈനികര്‍ കത്തിച്ചതെന്നാണ് റിപ്പോര്‍ട്ട്.