ആലപ്പുഴ : തിരുവനന്തപുരം കൊല്ലങ്കോട് മുതല്‍ മഞ്ചേശ്വരം വരെ 522 കിലോമീറ്റര്‍ ചുറ്റളവില്‍ നിര്‍മ്മിക്കുന്ന നിര്‍ദ്ദിഷ്ട കോസ്റ്റല്‍ ഗ്രീന്‍ കോറിഡോര്‍ പദ്ധതി തീരമേഖലയിലെ നിവസിക്കുന്ന മല്‍സ്യതൊഴിലാളികളുടെ പുനരധിവാസം ഉറപ്പാക്കിയതിനുശേഷം നടപ്പിലാക്കണമെന്ന് യു ഡി എഫ് ആലപ്പുഴ ജില്ലാ ചെയര്‍മാന്‍ എം മുരളി എക്‌സ് എം.എല്‍.എ ആവശ്യപ്പെട്ടു.
തീരദേശത്തിന്റെ സമഗ്ര വികസനത്തിന് നിരവധി പദ്ധതികളാണ് യു ഡി എഫ് വിഭാവനം ചെയ്തിട്ടുളളത്. അവയിലൊന്നാണ് ഗ്രീന്‍ കോറിഡോര്‍ പദ്ധതി. എ കെ ആന്റണി ഇതിനായി അശ്രാന്ത പരിശ്രമമാണ് നടത്തിയിട്ടുളളത്. കിഫ്ബയുടെ സഹായത്തോടെ 7881.40 കോടിയുടെ പദ്ധതി നടപ്പിലാക്കുമ്പോള്‍ 83 കിലോമീറ്റര്‍ പാത ആലപ്പുഴ ജില്ലയുടെ തീരമേഖലയിലൂടെയാണ് കടന്നുപോകുന്നത്.
ഇതിനായി നിര്‍മ്മിക്കുന്ന ഗ്രീന്‍ബെല്‍റ്റിന് 35 മീറ്റര്‍ വീതിയാണുളളത്. ഇത് തീരമേഖലയില്‍ കഴിയുന്ന ഇരുപതിനായിരത്തോളം മല്‍സ്യ തൊഴിലാളി കുടുംബങ്ങളുടെ വീടുകള്‍ നഷ്ടപ്പെടുത്തുന്നതാണ്. ഇവരുടെ പുനരധിവാസത്തിനായി സര്‍ക്കാര്‍ പദ്ധതി ആവിഷ്‌ക്കരിച്ചെങ്കിലും ഇത് വിപരീത ഫലം ഉളവാക്കുന്നതാണ്. ഒരേക്കര്‍ ഭൂമിയില്‍ നൂറ് കുടുംബങ്ങളെ വീതം പുനരധിവസിപ്പിക്കുന്ന പദ്ധതി തൊഴിലാളികളെ മല്‍സ്യമേഖലയില്‍നിന്നും അകറ്റുന്നതാണ്. സര്‍ക്കാര്‍ നിശ്ചയിച്ചിട്ടുളള ഫ്‌ളാറ്റ് സംവിധാനം മല്‍സ്യതൊഴിലാളികളെ കടുത്ത വറുതിയിലേക്ക് തളളിവിടുന്നതാണ്. ഇതിന് പരിഹാരമായി വേണ്ടത്ര പഠനവും പരിശോധനകളും നടത്തി മാത്രമെ പദ്ധതി നടപ്പിലാക്കാവു. മാത്രമല്ല നിലവിലുളള തീരദേശ റോഡുകളെ ബന്ധിപ്പിച്ച് പരമാവധി കുടിയൊഴിപ്പിക്കല്‍ ഒഴിവാക്കിയും വേണം പദ്ധതി നടപ്പിലാക്കാനെന്നും മുരളി ആവശ്യപ്പെട്ടു.