അടിമാലി: കലാ,കായിക പ്രതിഭകളെ കലാലയങ്ങളില്‍ നിന്ന് തന്നെ കണ്ടെത്തേണ്ടത് കാലഘട്ടത്തിന്റെ ആവശ്യമാണെന്ന് മുന്‍മന്ത്രി പി.ജെ ജോസഫ് എം.എല്‍.എ.
അറിവിനൊപ്പം സര്‍ഗാത്മക കഴിവുകള്‍ കൂടി വികസിപ്പിച്ചാലേ കുട്ടികളുടെ അറിവ് സമ്പൂര്‍ണമാകു എന്നും അദ്ദേഹം പറഞ്ഞു.
സംസ്ഥാന സി.ബി.എസ്.ഇ കലോത്സവം അടിമാലി വിശ്വദീപ്തി സി.എം.ഐ പബ്ലിക് സ്‌കൂളില്‍ ഉദ്ഘാടനം ചെയ്ത സംസാരിക്കുകയായിരുന്നു പി .ജെ ജോസഫ്. കുട്ടികളുടെ കലാരംഗത്തെ കഴിവുകള്‍ പരിപോഷിപ്പിക്കുന്നതില്‍ കലോത്സവങ്ങള്‍ മികച്ച പങ്കാണ് വഹിക്കുന്നതെന്നും അദ്ദേഹം പറഞ്ഞു.
ഹൈറേഞ്ചില്‍ ആദ്യമായി നാടക്കുന്ന സംസ്ഥാനതല കലോത്സവത്തില്‍ പങ്കെടുക്കാന്‍ കഴിഞ്ഞതില്‍ സന്തോഷമുണ്ടെന്ന് ചടങ്ങില്‍ മുഖ്യാതിഥിയായി പങ്കെടുത്ത നടന്‍ സായികുമാര്‍ പറഞ്ഞു.
ഇതില്‍ ജയവും തോല്‍വിയും പ്രശ്‌നമല്ല. മത്സരങ്ങളില്‍ സമ്മാനം വേണമെന്ന് ശഠിക്കരുതെന്ന് സായികുമാര്‍ പറഞ്ഞു. കലോത്സവങ്ങളാണ് കുട്ടികളുടെ വ്യക്തിത്വത്തെ സ്വാധീനിക്കുന്നതെന്നും കലാലയ ജീവിതത്തില്‍ തന്നെ മികച്ച പരിശീലനം ലഭിക്കുന്നതിനാല്‍ കുട്ടികള്‍ക്ക് പുതിയ കാലഘട്ടത്തിന്റെ വെല്ലുവിളികള്‍ സധൈര്യം നേരിടാന്‍ കഴിയുമെന്നും നദി ബിന്ദു പണിക്കര്‍ പറഞ്ഞു.
ഉദ്ഘാടന സമ്മേളനത്തില്‍ കേരള സി.ബി.എസ്.ഇ സ്‌കൂള്‍ മാനേജ്‌മെന്റ് അസോസിയേഷന്‍ സംസ്ഥാന പ്രസിഡണ്ട് ടി.പി.എം ഇബ്രാഹിംഖാന്‍ അധ്യക്ഷത വഹിച്ചു.