താമരശ്ശേരി: കൈതപ്പൊയില്‍ എം.ഇ.എസ് ഫാത്തിമറഹീം സെന്‍ട്രല്‍ സ്‌കൂള്‍ പരിസ്ഥിതി ക്ലബുകളുടെ കൂട്ടായ്മയില്‍ കൈതപ്പൊയില്‍ അങ്ങാടിയില്‍ സംഘടിപ്പിച്ച ജലസാക്ഷരതാ യജ്ഞം ശ്രദ്ധേയമായി.
ജലവുമായി ബന്ധപ്പെട്ട് പൊതുജനങ്ങളിലും വിദ്യാര്‍ഥികളിലും ബോധവല്‍ക്കരണ നടത്തുകയെന്ന ഉദ്ദേശത്തോടെ ഒരു മാസം നീണ്ടണ്ടുനില്‍ക്കുന്ന ജലസാക്ഷരതാ യജ്ഞത്തിനാണ് തുടക്കം കുറിച്ചത്. വിദ്യാര്‍ഥികള്‍ വരച്ച ചിത്രങ്ങളും പത്രങ്ങളില്‍ പ്രകൃതിയുമായി ബന്ധപ്പെട്ട് വന്ന ചിത്രങ്ങളും ലേഖനങ്ങളും പ്രദര്‍ശിപ്പിച്ചു.
പ്രദര്‍ശനം കേരള ശാസ്ത്ര സാഹിത്യപരിഷത്ത് എക്‌സിക്യൂട്ടിവ് മെമ്പര്‍ പ്രൊഫ. ഉണ്ണികൃഷ്ണന്‍ നമ്പീഷന്‍ ഉദ്ഘാടനം നിര്‍വഹിച്ചു. ബോധവല്‍ക്കരണ റാലിയും ലഘുലേഖ വിതരണവും നടത്തി. അടിവാരം, ഈങ്ങാപ്പുഴ, താമരശ്ശേരി, കോടഞ്ചേരി എന്നീ ടൗണുകള്‍ കേന്ദ്രീകരിച്ച് മഴവെള്ളം ശുദ്ധീകരിച്ച് കിണര്‍ റീച്ചാര്‍ജ്ജിങ് സംവിധാനം, തെരുവുനാടകം, ചിത്രപ്രദര്‍ശനം എന്നിവയാണ് നടപ്പാക്കുന്നത്.
ചടങ്ങില്‍ സ്‌കൂള്‍ മാനേജര്‍ കെ.എം.ഡി മുഹമ്മദ് അധ്യക്ഷനായി. വാര്‍ഡ് മെമ്പര്‍ കെ.സി ശിഹാബ്, കെ.കെ സഹീര്‍, കെ. സിദ്ദീഖ്, എ.സി അബ്ദുല്‍ അസീസ്, പി. ജാഫര്‍, ടി.കെ സുബൈര്‍, കാരാട്ട് മുഹമ്മദ് പ്രസംഗിച്ചു. പ്രസിന്‍സിപ്പല്‍ ജോസഫ് പുളിമൂട്ടില്‍ സ്വാഗതവും സനാ വില്‍സന്‍ നന്ദിയും പറഞ്ഞു.