പാലക്കാട്: ജില്ലാ സ്‌കൂള്‍ കായികമേളയില്‍ കുമരംപുത്തൂര്‍ കല്ലടി സ്‌കൂളിനെ വെല്ലാന്‍ ആരുമില്ല. കായികമേളയുടെ മികച്ച സ്‌കൂളെന്ന ചാംപ്യന്‍പട്ടം ഒരിക്കല്‍കൂടി കല്ലടി സ്‌കൂള്‍ തങ്ങളുടെ ഷോക്കേഴ്‌സില്‍ ചാര്‍ത്തി. 200 പോയിന്റുകള്‍ നേടിയാണ് മികച്ച ഓവറോള്‍ സ്‌കൂളായി കല്ലടി മാറിയത്. 131 പോയിന്റു നേടിയ മുണ്ടൂര്‍ എച്ച്.എസ് രണ്ടാമതും 130.5 പോയിന്റുമായി പറളി സ്‌കൂള്‍ മൂന്നാമതുമായി ഫിനിഷ് ചെയ്തു.
24 സ്വര്‍ണം, 22 വെളളി, 17 വെങ്കലം എന്നിവയായിരുന്നു കല്ലടിയുടെ മെഡല്‍ നേട്ടമെങ്കില്‍ മുണ്ടൂരിന്റേത് 18 സ്വര്‍ണം, 15 വെളളി, 5 വെങ്കലം എന്നിങ്ങനെയായിരുന്നു മെഡല്‍സമ്പാദ്യം. പറളി സ്‌കൂളിന് 14 സ്വര്‍ണവും 18 വെളളിയും 12 വെങ്കലവും ലഭിച്ചു.
മാത്തൂര്‍ സി.എഫ്.ഡി.വി.എച്ച്.എസ്.എസ് 33 പോയിന്റൂമായി നാലാംസ്ഥാനത്തേക്ക് കയറിവന്നു. 3,3,9 എന്നിങ്ങനെയായിരുന്നു ഈ സ്‌കൂളിന്റെ മെഡല്‍പട്ടിക. പാലക്കാട്ടെ മോയന്‍സ് സ്‌കൂളും നാലാം സ്ഥാനത്തുണ്ട്. 5 സ്വര്‍ണം, 2 വീതം വെളളിയും വെങ്കലവുമായിരുന്നു മോയന്‍സിന്റെ നേട്ടം.