തിരുവനന്തപുരം: നോട്ടുകള്‍ റദ്ദാക്കി പകരം നോട്ട് ലഭ്യമാക്കാത്ത കേന്ദ്ര സര്‍ക്കാര്‍ നടപടി നിയമവിരുദ്ധമാണെന്ന് മുന്‍ മുഖ്യമന്ത്രി ഉമ്മന്‍ചാണ്ടി.
നിയമമനുസരിച്ച് സ്വന്തം അക്കൗണ്ടില്‍ നിന്ന് ഒരാള്‍ സാധുവായ നോട്ടുകള്‍ പിന്‍വലിക്കുന്നത് തടയാന്‍ പാടില്ല. എന്നാല്‍ കയ്യിലുള്ള നോട്ടുകള്‍ അസാധുവാക്കുകയും അക്കൗണ്ടില്‍ നിന്ന് സാധുവായ നോട്ടുകള്‍ പിന്‍വലിക്കുന്നത് തടയുകയുമാണ് ചെയ്തിരിക്കുന്നത്. കുറ്റകരമായ അനാസ്ഥയാണിത്. രാജ്യത്തെ രണ്ടു ലക്ഷത്തിലധികം വരുന്ന എ.ടി.എമ്മുകളില്‍ പൂര്‍ണമായി നോട്ട് സജ്ജീകരിക്കാന്‍ ഇനിയും ആറു മാസമെങ്കിലുമെടുക്കും. പ്രതിസന്ധിയുണ്ടായ ദിവസങ്ങളില്‍ പേ ടി.എം കമ്പനി വന്‍ നേട്ടമാണുണ്ടാക്കിയത്. അവര്‍ പ്രധാനമന്ത്രിയെ പ്രശംസിച്ച് വന്‍ തോതില്‍ പരസ്യം നല്‍കിയിട്ടുമുണ്ട്. രാജ്യത്തിന്റെ പല ഭാഗങ്ങളിലും കൃഷിയിറക്കേണ്ട സമയമാണിത്. അതു സര്‍ക്കാര്‍ നടപടി മൂലം മുടങ്ങുകയാണ്. ഇതു മാപ്പര്‍ഹിക്കാത്ത കുറ്റമാണെന്നും ഉമ്മന്‍ചാണ്ടി പറഞ്ഞു. നിയമസഭയില്‍ നടന്ന ചര്‍ച്ചയില്‍ സംസാരിക്കുകയായിരുന്നു അദ്ദേഹം.