ചെന്നൈ: ആര്‍.ബി.ഐ പുറത്തിറക്കിയ 2000 രൂപ നോട്ടിലെ ദേവനാഗിരി ലിപിയിലുള്ള അക്കങ്ങള്‍, നോട്ടിന്റെ ഡിസൈനിന്റെ ഭാഗമാണെന്ന കേന്ദ്ര സര്‍ക്കാര്‍ വാദം മദ്രാസ് ഹൈക്കോടതി തള്ളി.
ഇതുസംബന്ധിച്ച കേസ് പരിഗണിക്കുമ്പോഴായിരുന്നു കേന്ദ്ര സര്‍ക്കാറിന്റെ അവകാശ വാദം കോടതി തള്ളിയത്. റിസര്‍വ് ബാങ്ക് ഗവര്‍ണര്‍ ഒപ്പിട്ട നോട്ടിലെ അക്കങ്ങള്‍ ഡിസൈനായി കണക്കാക്കാനാകില്ലെന്നു പറഞ്ഞ കോടതി സര്‍ക്കാര്‍ വാദം അംഗീകരിക്കാനാകില്ലെന്നും വ്യക്തമാക്കി.
നോട്ടില്‍ ദേവനാഗിരി ലിപിയിലുള്ള അക്കങ്ങള്‍ രേഖപ്പെടുത്തിയത് 1963ലെ ഔദ്യോഗിക ഭാഷാ നിയമത്തിന്റെ ലംഘനമാണെന്നുകാണിച്ച് ഡി.എം.കെ പ്രവര്‍ത്തകന്‍ കെ.പി.ടി ഗണേശന്‍ സമര്‍പ്പിച്ച ഹരജി പരിഗണിക്കുകയായിരുന്നു കോടതി. നിയമം ലംഘിച്ചതിനാല്‍ പുതിയ 2000 രൂപ നോട്ടിനെ അസാധുവായി പ്രഖ്യാപിക്കണമെന്നും ഹരജിക്കാരന്‍ ആവശ്യപ്പെട്ടിട്ടുണ്ട്.
ഭരണഘടനാ പ്രകാരം അക്കങ്ങള്‍ അന്താരാഷ്ട്ര തലത്തില്‍ ഉപയോഗിക്കാവുന്നവ മാത്രമേ ഔദ്യോഗികമായി അംഗീകരിക്കാനാകൂ എന്നും ഹരജിക്കാരന്‍ ചൂണ്ടിക്കാട്ടി. കേന്ദ്ര സര്‍ക്കാറിനുവേണ്ടി അഡീ. സോളിസ്റ്റര്‍ ജനറല്‍ ജി.ആര്‍ സ്വാമിനാഥന്‍ കോടതിയില്‍ ഹാജരായി. കേസ് ഈ മാസം 28ന് വീണ്ടും വാദം കേള്‍ക്കും.