ലണ്ടന്‍: ലേബര്‍ പാര്‍ട്ടി എംപി ആയിരുന്ന ജോ കോക്‌സിനെ കൊലപ്പെടുത്തിയ കേസില്‍ പ്രതി തോമസ് മെയര്‍ക്ക് ബ്രിട്ടീഷ് കോടതി ആജീവനാന്ത തടവ് ശിക്ഷ വിധിച്ചു.

ശിക്ഷാകാലാവധിക്കിടെ ഒരിക്കലും പരോളോ മറ്റ് ആനുകൂല്യങ്ങളോ നല്‍കി മെയറെ പുറത്തുപോകാന്‍ അനുവദിക്കരുതെന്നും കോടതി ഉത്തരവിട്ടു. ബ്രെക്സ്റ്റിന് ജനഹിത പരിശോധന നടക്കുന്നതിന് ഒരാഴ്ച മുമ്പാണ് ബ്രിട്ടനെ നടുക്കിയ കൊലപാതകം നടന്നത്.

അമേരിക്കയിലെ നവ നാസി സംഘടനയായ നാഷണല്‍ അലയന്‍സിന്റെ പ്രവര്‍ത്തകനാണ് ഇയാള്‍. പ്രതി പുരോഗമന വലതുപക്ഷ സംഘടനയില്‍ പ്രവര്‍ത്തിക്കുന്നയാളാണെന്നു നേരത്തെ പൊലിസ് കണ്ടെത്തിയിരുന്നു.

വടക്കന്‍ ഇംഗ്ലണ്ടിലെ ബ്രിസ്റ്റാള്‍ വില്ലേജില്‍വച്ചാണ് ലേബര്‍പാര്‍ട്ടി നേതാവായ എം.പിയെ പ്രതി കുത്തിയും വെടിവച്ചും കൊലപ്പെടുത്തിയത്.

ആയുധമുപയോഗിച്ചു മുറിവേല്‍പ്പിക്കല്‍, കൊലപാതകം തുടങ്ങിയ വകുപ്പുകളാണ് പ്രതിക്കെതിരേ ചുമത്തിയത്. നാഷണല്‍ അലയന്‍സിന്റെ പ്രസിദ്ധീകരണങ്ങള്‍ വായിക്കാന്‍ പ്രതി 620 ഡോളര്‍ ചെലവഴിച്ചതായി പൊലിസ് പറഞ്ഞു. അസഹിഷ്ണുതയാണ് കൊലപാതകത്തിലേക്ക് നയിച്ചതെന്നാണ് പൊലിസ് വിലയിരുത്തല്‍.