തിരുവനന്തപുരം: ജില്ലയിലെ തിരക്കുള്ള പ്രദേശങ്ങളില്‍ വഴിയോര കച്ചവടക്കാര്‍ കാല്‍നട യാത്രക്കാര്‍ക്കും വാഹനങ്ങള്‍ക്കും ബുദ്ധിമുട്ടുണ്ടാക്കുന്ന തരത്തില്‍ വാണിഭം നടത്തുന്നത് ശ്രദ്ധയില്‍പ്പെട്ട സാഹചര്യത്തില്‍ സുപ്രീംകോടതിയുടെ റോഡ് സുരക്ഷാ കമ്മിറ്റി മാര്‍ഗ്ഗനിര്‍ദ്ദേശങ്ങള്‍ നടപ്പില്‍ വരുത്തുന്നതിന് കര്‍ശന നടപടികള്‍ സ്വീകരിക്കുമെന്ന് എ.ഡി.എം. ജോണ്‍ വി. സാമുവല്‍ അറിയിച്ചു. ഇത് സംബന്ധിച്ച് എ.ഡി.എമ്മിന്റെ ചേമ്പറില്‍ വിളിച്ചുചേര്‍ത്ത കോര്‍പ്പറേഷന്‍ പ്രതിനിധികളുടേയും ബന്ധപ്പെട്ട ഉദ്യോഗസ്ഥരുടേയും യോഗത്തിലാണ് ഇക്കാര്യം അറിയിച്ചത്.
വഴിയോരക്കച്ചവടക്കാരെ ഒഴിപ്പിച്ച് പുനരധിവസിപ്പിക്കുന്നതിന് മാസ്റ്റര്‍ പ്ലാന്‍ തയ്യാറാക്കും. ഇതിന് മുന്നോടിയായി പകല്‍ സമയത്തും വൈകുന്നേരങ്ങളിലും കച്ചവടം നടത്തുന്നവരുടെ പ്രത്യേകം പട്ടിക തയ്യാറാക്കും. വാഹനങ്ങളില്‍ കച്ചവടം നടത്തുന്നവരുടെയും വാഹനത്തിന്റെയും വാഹന ഉടമയുടേയും വിവരങ്ങള്‍ ശേഖരിക്കും. പട്ടിക അടുത്ത മാസം പത്തിന് മുന്‍പായി സമര്‍പ്പിക്കുന്നതിന് കോര്‍പ്പറേഷന്‍ - മുനിസിപ്പാലിറ്റി ഉദ്യോഗസ്ഥര്‍ക്ക് നിര്‍ദ്ദേശം നല്‍കി. കൂടാതെ റോഡ് കൈയ്യേറ്റം, വൈദ്യുതി ദുരുപയോഗം എന്നിവയും പരിശോധിക്കും. യോഗത്തില്‍ റീജണല്‍ ടൗണ്‍ പ്ലാനര്‍ ശാരി എം.വി, പൊതുമരാമത്ത് അസി. എക്‌സി. എന്‍ജിനീയര്‍ (സിറ്റി റോഡ്‌സ്) സി. ഹരികുമാര്‍, നഗരസഭാ പ്രതിനിധികള്‍, വഴിയോരക്കച്ചവടക്കാരുടെ പ്രതിനിധികള്‍, വിവിധ ഉദ്യോഗസ്ഥര്‍ എന്നിവര്‍ പങ്കെടുത്തു.