കാഞ്ഞങ്ങാട്: ട്രെയ്‌നില്‍ കടത്തി കൊണ്ട് വന്ന കഞ്ചാവുമായി നടന്നു പോകുകയായിരുന്ന രണ്ടു പേരെ ഹൊസ്ദുര്‍ഗ് പൊലിസ് പിടികൂടി. തമിഴ്‌നാട്, മധുര സ്വദേശികളായ ശിവകുമാര്‍ (21), മസാന്‍ (24) എന്നിവരാണ് പൊലിസ് പിടിയിലായത്.

കഴിഞ്ഞ ദിവസം സന്ധ്യയോടെയാണ് സംഭവം. രഹസ്യ വിവരം ലഭിച്ചതിനെ തുടര്‍ന്ന് ഡി.വൈ.എസ്.പി.കെ ദാമോദരന്‍, സി.ഐ. സി.കെ സുനില്‍കുമാര്‍ എന്നിവരുടെ നേതൃത്വത്തില്‍ റയില്‍വേ സ്റ്റേഷനില്‍ നിന്നും നഗരത്തിലെ ബസ് സ്റ്റാന്റിലേക്കു പോകുന്ന ലിങ്ക് റോഡില്‍ വച്ച് ഇവരെ പൊലിസ് പിടികൂടിയത്.

നാലേകാല്‍കിലോ കഞ്ചാവാണ് ഇവരില്‍ നിന്നും പൊലിസ് കണ്ടെത്തിയത്. ജില്ലയില്‍ കഞ്ചാവ് എത്തിക്കുന്ന പ്രമുഖ കണ്ണികളായ ഇവര്‍ പള്ളിക്കര, മഠത്തില്‍ കോണ്‍ക്രീറ്റ് തൊഴിലാളികളെന്ന നിലയിലാണ് താമസിക്കുന്നതെന്നു പൊലിസ് പറഞ്ഞു. ട്രെയിനില്‍ കടത്തിക്കൊണ്ടുവന്ന കഞ്ചാവുമായി പള്ളിക്കരയിലേക്ക് പോകാനായി ഇവര്‍ ബസ്സ്റ്റാന്റിലേക്ക് നടന്നു വരുന്നതിനിടയിലാണ് പൊലിസ് ഇവരെ പിടികൂടിയത്.

ജില്ലയില്‍ കൂടുതല്‍ കഞ്ചാവ് വിതരണം നടക്കുന്നത് പള്ളിക്കര കേന്ദ്രീകരിച്ചാണെന്ന് പൊലിസിനു വിവരം ലഭിച്ചിരുന്നു. ഇതേ തുടര്‍ന്ന് ഇപ്പോള്‍ അറസ്റ്റിലായവരുടെ ഓരോ നീക്കങ്ങളും പൊലിസിന്റെ നിരീക്ഷണത്തിലായിരുന്നു. ഏതാനും ദിവസങ്ങള്‍ക്ക് മുമ്പ് ഇരുവരും പള്ളിക്കരയില്‍ നിന്നും മുങ്ങിയതായി പൊലീസിന് സൂചന ലഭിച്ചു.

ഇവര്‍ കഞ്ചാവുമായി തിരിച്ചുവരാന്‍ സാധ്യതയുണ്ടെന്ന് കണക്കു കൂട്ടിയ പൊലിസ് തമിഴ്‌നാട്ടില്‍ നിന്നും വരുന്ന ട്രെയിനുകള്‍ കാഞ്ഞങ്ങാട്ടെത്തുമ്പോള്‍ നിരീക്ഷിച്ചു വരുകയായിരുന്നു. കഴിഞ്ഞ ദിവസം പ്ലാസ്റ്റിക് കവറില്‍ പൊതിഞ്ഞ നിലയില്‍ ഇവര്‍ കഞ്ചാവുമായി വരുമ്പോഴാണ് പൊലിസ് പിടികൂടിയത്.

കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു. എസ്.ഐ. ബിജുപ്രകാശ്, പൊലിസുകാരായ രമേശന്‍, സി.കെ.രതീഷ്, രാജേഷ്, വിനശന്‍, സതീശന്‍, സുധീര്‍, സുരേഷ്, അബൂബക്കര്‍ എന്നിവരുള്‍പ്പെട്ട സംഘമാണ് കഞ്ചാവ് കടത്തിയവരെ പിടികൂടിയത്.