കാസര്‍കോട്: യു.ഡി.എഫ് എം.എല്‍.എമാരുടെ വികസന പ്രവര്‍ത്തനങ്ങളെ ഉയര്‍ത്തി പിടിച്ചു സി.പി.എം മന്ത്രിയുടെ പ്രശംസ നാട്ടുകാരെ അമ്പരപ്പിച്ചു. തെരഞ്ഞെടുപ്പില്‍ തങ്ങളുടെ സ്ഥാനാര്‍ഥി മഞ്ചേശ്വരത്തു തോറ്റതില്‍ കുഴപ്പമില്ല. റസാഖ് നിസാര വോട്ടിനെങ്കിലും ജയിച്ചതു നന്നായെന്നും മഞ്ചേശ്വരത്ത് ബി.ജെ.പി.യെ നേരിയ വോട്ടുകള്‍ക്കു പരാജയപ്പെടുത്തിയ അബ്ദുല്‍ റസാഖ് എം.എല്‍.എ.യെ ചൂണ്ടിക്കാട്ടി മന്ത്രി ജി സുധാകരന്‍ പറഞ്ഞു.
കാസര്‍കോട് ജില്ലയിലെ എം.എല്‍.എമാര്‍ ജനങ്ങള്‍ക്കു വേണ്ടി ശബ്ദിക്കുന്നതായാണു കാണുന്നത്. വികസന കാര്യത്തില്‍ രാഷ്ട്രീയം കലര്‍ത്തരുത്. അതേസമയം, യു.ഡി.എഫ് സര്‍ക്കാരിന്റെ കാലത്ത് തന്റെ മണ്ഡലത്തിലേക്ക് ഒന്നും ചെയ്യാന്‍ സര്‍ക്കാര്‍ ശ്രമിച്ചില്ല. എന്നാല്‍ ആറു മാസം കൊണ്ടു മുന്‍ മുഖ്യമന്ത്രി ഉമ്മന്‍ ചാണ്ടിയുടെയും മുന്‍ മന്ത്രി വി.കെ ഇബ്രാഹിം കുഞ്ഞിന്റെയും മണ്ഡലത്തിലേക്കു കോടികളുടെ വികസന പ്രവൃത്തിയാണു താന്‍നടത്തിയതെന്നും മന്ത്രി കൂട്ടിച്ചേര്‍ത്തു.