വാടാനപ്പള്ളി: രണ്ട് ചായക്ക് 16 രൂപയുടെ ചെക്ക്. ഹര്‍ത്താല്‍ ദിവസമായ ഇന്നലെ രാവിലെ വാടാനപ്പള്ളി മൊളുബസാര്‍ സെന്ററിനു സമീപത്തെ ചായക്കടയിലാണ് കൗതുകകരമായ സംഭവം നടന്നത്.
ചായകുടിക്കാനെത്തിയ സുബൈര്‍ എന്ന മധ്യവയക്കന്‍ രണ്ട് ചായ കുടിച്ച ശേഷം ആയിരം രൂപ കടയുടമ മുഹമ്മദിന് നല്‍കിയപ്പോള്‍ ആയിരം രൂപയുടെ നോട്ട് എടുക്കില്ലെന്ന് പറഞ്ഞു, മറ്റു ചില്ലറയും ഇല്ലാതായപ്പോള്‍ സുബൈര്‍ കീശയില്‍ നിന്നും ചെക്കെടുത്ത് പതിനാറ് രൂപയുടെ ചെക്ക് എഴുതി കടയുടമ മുഹമ്മദിനു നല്‍കി.
ഇത് കടയില്‍ ചായകുടിക്കാനെത്തിയവര്‍ക്ക് കൗതുകമായി. ഇനി ഈ 16 രൂപയുടെ ചെക്ക് മാറണമെങ്കില്‍ നൂറുരൂപ വണ്ടിക്കൂലി നല്‍കി പകുതി ദിവസത്തെ അവധിയും എടുത്ത് ബാങ്കില്‍ ക്യൂ നില്‍ക്കണം. ഇനി ആരും ചായകുടിച്ച് ചെക്ക് തരല്ലെ എന്ന പ്രാര്‍ഥനയിലാണ് കടയുടമ മുഹമ്മദ്.