ആലപ്പുഴ: ഹരിതകേരളം മിഷന്‍ പദ്ധതികള്‍ സമയബന്ധിതമായി നടപ്പാക്കുന്നതിനായി വാര്‍ഡുതലം വരെയുള്ള കര്‍മപരിപാടി തദ്ദേശസ്വയംഭരണസ്ഥാപനങ്ങള്‍ ഉടന്‍ തയാറാക്കണമെന്ന് മുഖ്യമന്ത്രി പിണറായി വിജയന്‍ പറഞ്ഞു.
സംസ്ഥാന സര്‍ക്കാര്‍ നടപ്പാക്കുന്ന ഹരിതകേരളം മിഷന്റെ ഭാഗമായി ജില്ലാതല ഒരുക്കങ്ങള്‍ വിലയിരുത്തുന്നതിനായി ജില്ലകളുടെ ചുമതലയുള്ള മന്ത്രിമാരും ജനപ്രതിനിധികളും ഉദ്യോഗസ്ഥരുമായി നടത്തിയ വീഡിയോ കോണ്‍ഫറന്‍സില്‍ സംസാരിക്കുകയായിരുന്നു അദ്ദേഹം. ജില്ലാ മിഷന്‍ കര്‍മപരിപാടികളടങ്ങിയ കലണ്ടര്‍ തയാറാക്കണം. ജനുവരിക്കകം ജില്ലാതല കലണ്ടറിന് രൂപം നല്‍കണം.
മാലിന്യം നിറഞ്ഞ തോടുകളും ജലാശയങ്ങളും കുളങ്ങളും വീണ്ടെടുക്കാനുള്ള പദ്ധതികള്‍ ആവിഷ്‌കരിച്ച് നടപ്പാക്കണം. വേനല്‍ വരുന്നതിനാല്‍ ജലലഭ്യതകുറവുള്ള സ്ഥലങ്ങളില്‍ വെള്ളം വറ്റിച്ചുള്ള പ്രവര്‍ത്തികള്‍ ഇപ്പോള്‍ നടത്തരുത്.
മാലിന്യസംസ്‌കരണത്തിന് നൂതനമാര്‍ഗങ്ങള്‍ ആവിഷ്‌കരിക്കണം. ത്രിതലപഞ്ചായത്തുകള്‍ പൂര്‍ണസജ്ജമാകണം. ബോധവത്കരണ പരിപാടികളിലടക്കം വിദ്യാഭ്യാസ സ്ഥാപനങ്ങളുടെ സജീവ പങ്കാളിത്തം ഉറപ്പാക്കണം. വിദ്യാഭ്യാസ വകുപ്പ് ഇതിനായി ജില്ലാതല കോഓര്‍ഡിനേറ്റര്‍മാരെ നിയോഗിക്കണം. ജില്ലയില്‍ പദ്ധതികളുടെ ഏകോപനവും വിവിധ വകുപ്പുകളുടെ ഏകോപനവും ജില്ലാ കളക്ടര്‍മാര്‍ നടത്തും. ഡിസംബര്‍ എട്ടിനു നടക്കുന്ന ജില്ലാതല ഉദ്ഘാടന പരിപാടികളുടെ ചുമതല കളക്ടര്‍മാര്‍ വഹിക്കുംമുഖ്യമന്ത്രി പറഞ്ഞു.
ജലാശയങ്ങളുടെ വീണ്ടെടുപ്പിനും പരിസരശുചീകരണത്തിനും പ്രാധാന്യം നല്‍കുന്ന പദ്ധതികള്‍ നടപ്പാക്കുമെന്ന് ജില്ലയുടെ ചുമതലയുള്ള പൊതുമരാമത്ത് വകുപ്പു മന്ത്രി ജി. സുധാകരന്‍ കോണ്‍ഫറന്‍സില്‍ പറഞ്ഞു. വിദ്യാഭ്യാസ സ്ഥാപനങ്ങള്‍ വഴി വിപുലമായ ബോധവത്കരണ പ്രവര്‍ത്തനങ്ങള്‍ നടത്തും. സ്‌കൂളുകളിലും വീടുകളിലും പച്ചക്കറി കൃഷി വ്യാപിപ്പിക്കാനും തരിശുനില കൃഷി പ്രോത്സാഹിപ്പിക്കാനുമുള്ള പദ്ധതികള്‍ക്ക് മുന്‍ഗണന നല്‍കും. വിപുലമായ ജനപങ്കാളിത്തം ഉറപ്പാക്കുമെന്നും മന്ത്രി പറഞ്ഞു.