ആലുവ : നിറഞ്ഞൊഴുകുന്ന ആലുവാപ്പുഴ കുറുകെ നീന്തിക്കയറി അഞ്ചരവയസ്സുകാരി അത്ഭുത താരമായി. ഇന്നു രാവിലെയാണ് ആലുവയെ സാക്ഷിയാക്കി, മണലെടുത്ത് അഗാധ ഗര്‍ത്തങ്ങളുള്ള പെരിയാര്‍ ഈ കൊച്ചുമിടുക്കി 24 മിനിറ്റുകൊണ്ട് നീന്തിക്കയറിയത്. ഇരുകരകളിലും നിന്ന കാണികള്‍ ശ്വാസമടക്കിയാണ് ഈ സാഹസിക നീന്തല്‍ കണ്ടുനിന്നത്. ഇതോടെ ഏലൂര്‍ മഞ്ഞുമ്മല്‍ ഗാര്‍ഡിയന്‍സ് എയ്ഞ്ചല്‍സ് പബ്ലിക് സ്‌കൂളിലെ യു.കെ.ജി. വിദ്യാര്‍ത്ഥിനിയായ നിവേദിത പെരിയാര്‍ നീന്തി കീഴടക്കിയ ഏറ്റവും പ്രായം കുറഞ്ഞ താരമായി.
അപ്പോളോ ടയേഴ്‌സ് ജീവനക്കാരന്‍ ഏലൂര്‍ ഉദ്യോഗമണ്ഡല്‍ മാടപ്പറമ്പില്‍ ഇ.എസ്. സജീന്ദ്രന്റെയും, ജിഷയുടെയും മകളാണ് നിവേദിത. നീന്തലിനോടുള്ള താല്‍പര്യം കണക്കിലെടുത്ത് നിവേദിതയെ പെരിയാറിലെ പരിശീലകനായ സജിയെ ഏല്‍പിക്കുകയായിരുന്നു. പരീശീലനത്തിന്റെ ഭാഗമായി 13 തവണ ഈ മിടുക്കി പെരിയാര്‍ മുറിച്ചു കടന്നിരുന്നു. മണല്‍കൊള്ളയുടെ ഭാഗമായി ആഴത്തിലുള്ള മരണക്കുഴികളുള്ള ഭാഗത്തായിരുന്നു ഈ അഞ്ചരവയസ്സുകാരിയുടെ സാഹസിക നീന്തല്‍. ഇന്നലെ രാവിലെ 9 മണിയോടെ അദ്വൈതാശ്രമം കടവില്‍നിന്നും മറുകരയായ ശിവരാത്രി മണപ്പുറം ലക്ഷ്യമാക്കിയായിരുന്നു നീന്തല്‍. ആശ്രമത്തിലെ ജയന്‍ ശാന്തി ഈ സാഹസിക ഉദ്യമം ഫ്‌ളാഗ് ഓഫ് ചെയ്തു.
കണ്ടുനിന്ന കാണികള്‍ കൈയ്യടിയോടുകൂടി നിവേദിതയെ നീന്താന്‍ പ്രോത്സാഹിപ്പിച്ചു. മണപ്പുറത്ത് നീന്തിയെത്തിയ മിടുക്കിയെ അവിടെ കൂടി നിന്നവര്‍ ഹര്‍ഷാരവങ്ങളോടെ സ്വീകരിച്ചു. ആലുവ നഗരസഭ ചെയര്‍പേഴ്‌സണ്‍ ലിസി എബ്രഹാം നിവേദിതയ്ക്ക് നാടിന്റെ സ്‌നേഹോപഹാരം സമര്‍പ്പിച്ചു. അങ്കമാലി നഗരസഭ ചെയര്‍പേഴ്‌സണ്‍ ഗ്രേസി ജോയി, ഏലൂര്‍ നഗരസഭ കൗണ്‍സിലര്‍ കാര്‍ത്തികേയന്‍ എന്നിവര്‍ അഭിനന്ദനങ്ങള്‍ അറിയിച്ചു. ആലുവയിലെ വന്‍ പൗരാവലി ചടങ്ങുകള്‍ക്ക് സാക്ഷിയായി,
മുങ്ങിമരണങ്ങള്‍ പതിവായ പശ്ചാത്തലത്തിലാണ് തികച്ചും സൗജന്യമായി കുട്ടികളടക്കമുള്ളവരെ നീന്തല്‍ പഠിപ്പിക്കാന്‍ സജി വാളാശ്ശേരി മുന്നോട്ടുവന്നത്. 7 വര്‍ഷത്തിനിടെ 800-ഓളം കുട്ടികളെ സജി നീന്തല്‍ അഭ്യസിപ്പിച്ചിട്ടുണ്ട്. ഇതില്‍ 200-ഓളം പേര്‍ പെരിയാര്‍ നീന്തിക്കടന്ന് കരുത്ത് തെളിയിക്കുകയും ചെയ്തു. ഇതില്‍ ഏറ്റവും പ്രായം കുറഞ്ഞ താരമായാണ് നിവേദിത പെരിയാര്‍ നീന്തിക്കയറിയത്.
നിവേദിതയുടെ നീന്തല്‍ പ്രകടനത്തിനായി എല്ലാവിധ സുരക്ഷാ സംവിധാനങ്ങളും സജ്ജമാക്കിയിരുന്നു.സ്‌കൂബ ഡൈവേഴ്‌സ് ബോട്ടില്‍ രക്ഷാദൗത്യവുമായി പുഴയിലുണ്ടായിരുന്നു. കൂട്ടുകാരിയുടെ സാഹസിക പ്രകടനം നേരില്‍ക്കാണാന്‍ നിവേദിത പഠിയ്ക്കുന്ന ഗാര്‍ഡിയന്‍ എയ്ഞ്ചല്‍സ് സ്‌കൂളിലെ കുട്ടികള്‍ അധ്യാപകരോടൊപ്പം എത്തിയിരുന്നു.