കോട്ടയം: മഹാത്മാഗാന്ധി സര്‍വകലാശാല സ്‌കൂള്‍ ഓഫ് ഫിസിക്കല്‍ എജ്യുക്കേഷന്‍ ആന്റ് സ്‌പോര്‍ട്‌സ് സയന്‍സിന്റെ ആഭിമുഖ്യത്തില്‍ അഖിലേന്ത്യാ അന്തര്‍ സര്‍വകലാശാലാ പുരുഷ വോളിബോള്‍ മത്സരങ്ങള്‍ സംഘടിപ്പിക്കും. പാലാ സെന്റ് തോമസ് കോളജില്‍ ഡിസംബര്‍ രണ്ടു മുതല്‍ ആറു വരെയും എട്ടു മുതല്‍ 12 വരെയുമാണ് മത്സരങ്ങള്‍. കേരളം, തമിഴ്‌നാട്, കര്‍ണാടക, പോണ്ടിച്ചേരി അടക്കമുള്ള ദക്ഷിണേന്ത്യന്‍ സംസ്ഥാനങ്ങളില്‍ നിന്നുള്ള 83 സര്‍വകലാശാലാ ടീമുകളാണ് മത്സരങ്ങളില്‍ പങ്കെടുക്കുന്നത്. ദക്ഷിണ, ഉത്തര, പൂര്‍വ, പശ്ചിമ മേഖലകളില്‍ നിന്നു യോഗ്യത നേടുന്ന നാലു ടീമുകള്‍ വീതം 16 ടീമുകളാണ് അഖിലേന്ത്യാ മത്സരങ്ങളില്‍ മാറ്റുരയ്ക്കുന്നത്. നോക്കൗട്ട് കം ലീഗ് അടിസ്ഥാനത്തിലാണു മത്സരങ്ങള്‍ നടത്തുന്നത്.