നീലേശ്വരം: കൃഷിയില്‍ വൈവിധ്യങ്ങള്‍ തേടുകയാണു തൈക്കടപ്പുറത്തെ ശശിധരന്‍. പരിപാലനത്തിലും ഇദ്ദേഹം വ്യത്യസ്തനാണ്. കടുക്, കാരറ്റ്, പടവലം, പാവല്‍, കക്കിരി, തണ്ണിമത്തന്‍, ചോളം തുടങ്ങിയവയാണു ഇദ്ദേഹത്തിന്റെ തോട്ടത്തില്‍ വിളയുന്നത്. ഇപ്പോള്‍ തക്കാളി കൃഷിയും തുടങ്ങിയിട്ടുണ്ട്.
എല്ലാ കൃഷികളില്‍ നിന്നും നൂറുമേനി വിളവാണു ലഭിക്കുന്നതെന്നു ശശിധരന്‍ പറയുന്നു. പെയിന്റിങ് തൊഴിലാളിയായ ഇദ്ദേഹം രാവിലെയും വൈകീട്ടുമാണു തന്റെ വിളകളെ പരിചരിക്കുന്നത്. പാട്ടത്തിനെടുത്ത വയലില്‍ മല്ലിക കൃഷി ചെയ്തും ഇദ്ദേഹം വ്യത്യസ്തനാകുന്നു.
ജൈവവളമാണു കൃഷികള്‍ക്കുപയോഗിക്കുന്നത്. വിഷരഹിത പച്ചക്കറി വാങ്ങാന്‍ ശശിധരന്റെ തോട്ടത്തില്‍ നിരവധി പേരാണു എത്തുന്നത്.