സുല്‍ത്താന്‍ ബത്തേരി: കാട്ടാനപ്പേടിയില്‍ നഗരസഭയിലെ കട്ടയാട് നിവാസികള്‍. കഴിഞ്ഞ ഒരു മാസമായി പ്രദേശത്ത് കാട്ടാനശല്യം രൂക്ഷമാണ്. നിരവധി കര്‍ഷകരുടെ കൃഷികളാണ് ഇതിനകം കാട്ടാനകള്‍ നശിപ്പിച്ചത്. സന്ധ്യയായാല്‍ പ്രദേശത്തെത്തുന്ന കാട്ടാനകള്‍ ഇപ്പോള്‍ മനുഷ്യജീവനും ഭീഷണിയായിരിക്കുകയാണ്. വന്യമൃഗ പ്രതിരോധ സംവിധാന കാര്യക്ഷമമാക്കണമെന്ന നാട്ടുകാരുടെ ആവശ്യം വനം വകുപ്പ് അധികൃതര്‍ അവഗണിക്കുകയാണമെന്നും ആക്ഷേപമുണ്ട്.
വായ്പ എടുത്തും മറ്റുമാണ് പ്രദേശത്തെ കര്‍ഷകര്‍ കൃഷിയിറക്കിയിരിക്കുന്നത്. കാട്ടാനകള്‍ പ്രദേശത്ത് തമ്പടിച്ചതോടെ കര്‍ഷകരാണ് വെട്ടിലായിരിക്കുന്നത്. രാത്രികാലങ്ങളില്‍ കാവലിരുന്നാണ് കര്‍ഷകര്‍ കാട്ടാനകളെ വനത്തിലേക്ക് തുരത്തിയിരുന്നത്. എന്നാല്‍ അടുത്തിടെ കര്‍ഷകരെ ആനകള്‍ ഓടിച്ചതായും നാട്ടുകാര്‍ പറഞ്ഞു. പ്രദേശത്തെ കാട്ടാനശല്യത്തിന് അടിയന്തര പരിഹാരം കാണണമെന്നും നടപടികളുണ്ടായില്ലെങ്കില്‍ പ്രക്ഷോഭം നടത്തുമെന്നും നാട്ടുകാര്‍ മുന്നറിയിപ്പ് നല്‍കി.