തൃശൂര്‍: കെട്ടിടനിര്‍മാണം, നിര്‍മാണ സാമഗ്രികള്‍, അനുബന്ധ വ്യവസായം എന്നിവയിലെ ട്രേഡ് യൂനിയനുകളുടെ അന്താരാഷ്ട്ര കൂട്ടായ്മയായ യു.ഐ.ടി.ബി.ബിയുടെ നേതൃസമ്മേളനം 10, 11, 12 തിയ്യതികളിലായി തൃശൂരില്‍ നടക്കുമെന്ന് സംഘാടക സമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 10ന് ഏഷ്യാ-പസഫിക് രാജ്യങ്ങളുടെ മേഖലാ യോഗങ്ങളും 11, 12 തിയതികളില്‍ അന്താരാഷ്ട്ര നിര്‍വാഹക സമിതി യോഗവും നടക്കും.
ഇന്ത്യയില്‍ ആദ്യമായാണ് യു.ഐ.ടി.ബി.ബി നേതൃയോഗം നടക്കുന്നത്. വിദേശ പ്രതിനിധികളും ഇന്ത്യയിലെ സി.ഡബ്ലിയു.എഫ്.ഐ ഭാരവാഹികളായ ക്ഷണിതാക്കളും സമ്മേളനത്തില്‍ പങ്കെടുക്കും. 10ന് രാവിലെ 10 മണിക്ക് തൃശൂര്‍ പൂരം ഇന്റര്‍നാഷണല്‍ ഹോട്ടലില്‍ സിഐടിയു സംസ്ഥാന ജനറല്‍ സെക്രട്ടറി എളമരം കരീം ഏഷ്യാപസഫിക് മേഖല സമ്മേളനം ഉദ്ഘാടനം ചെയ്യും.
 11ന് രാവിലെ 10ന് അന്താരാഷ്ട്ര നിര്‍വ്വാഹകസമിതി യോഗം സിഐടിയു അഖിലേന്ത്യാ ജനറല്‍ സെക്രട്ടറി തപന്‍സെന്‍ എം പി ഉദ്ഘാടനം ചെയ്യും. വൈകീട്ട് നാലിന് തെക്കേ ഗോപുരനടയില്‍ പൊതുസമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും.
വാര്‍ത്താസമ്മേളനത്തില്‍ സ്വാഗത സംഘം ചെയര്‍പേഴ്‌സന്‍ മേയര്‍ അജിത ജയരാജന്‍, യു.പി ജോസഫ്, കോനിക്കര പ്രഭാകരന്‍ പങ്കെടുത്തു.