തൊടുപുഴ : തൊടുപുഴ നഗരത്തിലും സമീപ പഞ്ചായത്തുകളിലും അജ്ഞാത സംഘം ഭീതി വിതക്കുന്നു.
കഴിഞ്ഞ ദിവസം കീരികോട് ട്യൂഷന്‍ കഴിഞ്ഞുപോയ പെണ്‍കട്ടിയെ വാഹനത്തിലെത്തിയ അജ്ഞാത സംഘം ഭയപ്പെടുത്തിയതിന് പിന്നാലെ വ്യാഴാഴ്ച ഉടുമ്പന്നൂരിലും സമാന സംഭവം ആവര്‍ത്തിച്ചത്  പരിഭ്രാന്തി സൃഷ്ടിച്ചു.  ഉടുമ്പന്നൂര്‍ മങ്കുഴി ഹൈസ്‌കൂളില്‍ ഏഴാം ക്ലാസില്‍ പഠിക്കുന്ന പരിയാരം സ്വദേശിയായ ആണ്‍കുട്ടിയെയാണ് വ്യാഴാഴ്ച രാവിലെ ഒമ്പത് മണിയോടെ ലിഫ്റ്റ് നല്‍കാമെന്ന് പറഞ്ഞ് തട്ടികൊണ്ടുപോകാന്‍ ശ്രമം നടന്നത്.  
ചുവന്ന മാരുതി ഓംമ്‌നിയില്‍ രണ്ടുപേര്‍ ഉണ്ടായിരുന്നുവെന്ന് കുട്ടി പറയുന്നു. ലിഫ്റ്റ് നിഷേധിച്ചെങ്കിലും പിന്നാലെ മുഖംമൂടി ധരിച്ചനിലയില്‍ ഇവര്‍ വീണ്ടും വന്നതോടെ കുട്ടി സമീപത്തുള്ള ഒരു വീട്ടില്‍ ഓടി കയറുകയായിരുന്നു. എന്നാല്‍ സംഭവം സംബന്ധിച്ച് കുട്ടി വൈകുന്നേരം വീട്ടില്‍ വന്ന് പറഞ്ഞശേഷമാണ് മാതാപിതാക്കള്‍ പൊലിസില്‍ വിവരം അറിയിക്കുന്നത്. ഇതേ തുടര്‍ന്ന് കരിമണ്ണൂര്‍ എസ്.ഐയുടെ നേതൃത്വത്തില്‍ പൊലിസ് സംഘം സ്ഥലത്തെത്തി പരിശോധന നടത്തി.
കഴിഞ്ഞ ശനിയാഴ്ചയാണ് കീരികോട് നിന്നും ഇത്തരമൊരു സംഭവം റിപോര്‍ട്ട്  ചെയ്തത്.   ട്യൂഷന്‍ കഴിഞ്ഞ് വീട്ടിലേക്ക് മടങ്ങുമ്പോഴാണ് വിദ്യാര്‍ഥിനിയെ മുഖംമൂടി സംഘം പിന്തുടരുന്നത് ശ്രദ്ധയില്‍പ്പെടുന്നത്.  ഇവര്‍ പെണ്‍കുട്ടിയെ തടയാന്‍ ശ്രമിക്കുകയും പ്രത്യേക രീതില്‍ ശബ്ദം ഉണ്ടാക്കുകയും ചെയ്തു. ഭയന്നുപോയ പെണ്‍കുട്ടി ഓടി അടുത്ത വീട്ടിലെത്തുകയായിരുന്നു.
തുടര്‍ന്ന് പരിസരവാസികള്‍ തിരച്ചില്‍ നടത്തിയെങ്കിലും ആരെയും കണ്ടെത്താനായില്ല.  മുഖംമൂടി സംഭവത്തിന് ശേഷം വീടിന് ചുറ്റും തിരച്ചില്‍ നടത്തിയപ്പോഴാണ് വിരലില്‍ മഷി പുരട്ടി പതിപ്പിച്ചത് പോലുള്ള അടയാളം കണ്ടത് പരിഭ്രാന്തി സൃഷ്ടിച്ചിരുന്നു. കുട്ടികളെ തട്ടിക്കൊണ്ടു പോകുന്ന സംഘത്തിലുള്ളവരോണോ ഇതെന്ന് സംശയിക്കുന്നതായി നാട്ടുകാര്‍ പറഞ്ഞു.