ചേര്‍ത്തല: കെ.എസ്.ആര്‍.ടി.സി ജീവനക്കാരുടെ നവംബര്‍ മാസത്തെ ശമ്പളം വൈകുന്നതില്‍ പ്രതിഷേധിച്ച് ട്രാന്‍സ്‌പോര്‍ട്ട് ഡെമോക്രാറ്റിക് ഫെഡറേഷന്റെ നേതൃത്വത്തില്‍ ചേര്‍ത്തല ഡിപ്പോയില്‍ ധര്‍ണ്ണ നടത്തി.
കെ.പി.സി.സി നിര്‍വ്വാഹക സമിതിയംഗം അഡ്വ: എസ് ശരത് ധര്‍ണ്ണ ഉദ്ഘാടനം ചെയ്തു.നോട്ട് പിന്‍വലിക്കല്‍ തീര്‍ത്ത പ്രതിസന്ധിയില്‍ വലയുന്ന ജീവനക്കാര്‍ക്ക് സംസ്ഥാന സര്‍ക്കാരും, കോര്‍പ്പറേഷന്‍ മാനേജ്‌മെന്റും ചേര്‍ന്നു നല്‍കിയ പ്രഹരമാണ് ശമ്പളം നിഷേധിക്കുന്ന നടപടിയെന്ന് അദ്ദേഹം പറഞ്ഞു.
ശബരിമല തീര്‍ത്ഥാടകര്‍ക്ക് ബുദ്ധിമുട്ടുണ്ടാകുമെന്നതിനാലാണ്  പണിമുടക്ക് ഉള്‍പ്പെടെയുളള സമര മാര്‍ഗ്ഗങ്ങള്‍ സ്വീകരിക്കാത്തതെന്നും, ഇത്  ദൗര്‍ബല്യമായി കാണരുതെന്നും നേതാക്കള്‍ പറഞ്ഞു.
ട്രാന്‍സ്‌പോര്‍ട്ട് വര്‍ക്കേഴ്‌സ് യൂണിയന്‍ ഐ.എന്‍.ടി.യു.സി ജില്ലാ സെക്രട്ടറി ബെന്നി ജോസ്, യൂണിറ്റ് നേതാക്കളായ പി.ജി വേണുഗോപാല്‍, ജി.ബാലമുരളികൃഷ്ണ ,കെ രാജേഷ്, പി.ഹരികുമാര്‍ എന്നിവര്‍ പ്രസംഗിച്ചു.