കൊണ്ടോട്ടി: ഹജ്ജ് 2017 ട്രെയ്‌നര്‍മാരായി പ്രവര്‍ത്തിക്കാന്‍ അപേക്ഷ നല്‍കിയവര്‍ക്കുള്ള അഭിമുഖം കണ്ണൂര്‍, കരിപ്പൂര്‍ ഹജ്ജ് ഹൗസ്, കോഴിക്കോട്, എറണാകുളം, എന്നിവിടങ്ങളിലായി നടക്കും. ഈ വര്‍ഷം 557 പേരാണ് വിവിധ ജില്ലകളില്‍ നിന്ന് പ്രതിഫലം ആഗ്രഹിക്കാതെ അപേക്ഷകരായുള്ളത്. ഇവരില്‍ നിന്നും അഭിമുഖം നടത്തിയാണ് ട്രെയ്‌നര്‍മാരെ തിരഞ്ഞെടുക്കുക.
കണ്ണൂര്‍ ഡി.ഐ.എസ്.ഇംഗ്ലീഷ് സ്‌കൂള്‍ ഓഫിസില്‍ 20ന് രാവിലെ 10ന് നടക്കുന്ന അഭിമുഖത്തില്‍ കണ്ണൂര്‍, കാസര്‍കോട് ജില്ലകളില്‍ നിന്നുള്ളവര്‍ പങ്കെടുക്കണം. 21ന് കരിപ്പൂര്‍ ഹജ്ജ് ഹൗസില്‍ രാവിലെ 9.30ന് നടക്കുന്ന അഭിമുഖത്തില്‍ മലപ്പുറം, പാലക്കാട്, തൃശൂര്‍ ജില്ലകളില്‍ നിന്നുള്ളവരാണ് പങ്കെടുക്കേണ്ടത്.
22ന് കോഴിക്കോട് വഖ്ഫ് ബോര്‍ഡ് ഓഫിസില്‍ രാവിലെ 10ന് നടക്കുന്ന അഭിമുഖത്തില്‍ കോഴിക്കോട്,വയനാട് ജില്ലകളില്‍ നിന്നുള്ളവര്‍ ഹാജരാകണം. 26ന് എറണാകുളം വഖ്ഫ് ബോര്‍ഡ് ഓഫിസില്‍ രാവിലെ 10ന് നടക്കുന്ന അഭിമുഖത്തില്‍ എറണാകുളം, ഇടുക്കി, കോട്ടയം, ആലപ്പുഴ, കൊല്ലം, പത്തനംതിട്ട, തിരുവനന്തപുരം ജില്ലകളില്‍ നിന്നുള്ളവരും പങ്കെടുക്കണം.
ഹജ്ജ് ട്രെയ്‌നര്‍മാരായി പ്രവര്‍ത്തിക്കാന്‍ അപേക്ഷ സമര്‍പ്പിച്ചവര്‍ക്ക് കംപ്യൂട്ടര്‍, ഇന്റര്‍ നെറ്റ്, ഇ-മെയില്‍ പരിജ്ഞാനമുണ്ടായിരിക്കണം.
ഹജ്ജ് അപേക്ഷകര്‍ക്ക് വേണ്ടുന്ന മുഴുവന്‍ നിര്‍ദേശങ്ങള്‍ നല്‍കുകയും അപേക്ഷയും ഇതോടൊപ്പം സമര്‍പ്പിക്കേണ്ട രേഖകളും സമയബന്ധിതമായി ഹജ്ജ് കമ്മിറ്റി ഓഫിസില്‍ എത്തിക്കാന്‍ സഹായിക്കുകയും വേണം.
ഹജ്ജിന് അപേക്ഷ നല്‍കാന്‍ ഉദ്ദേശിക്കുന്നവര്‍ക്കുള്ള ക്ലാസ് അനുയോജ്യമായ സ്ഥലത്ത് സന്നദ്ധ സംഘടനകളുടേയും വ്യക്തികളുടേയും സഹായത്തോടെ സംഘടിപ്പിക്കേണ്ടതും ട്രെയ്‌നര്‍മാരാണ്.