പള്ളിക്കല്‍: പള്ളിക്കല്‍ബസാര്‍ പള്ളിയില്‍ കാന്തപുരം വിഭാഗം നടത്തിയ അക്രമത്തിനെതിരേ നടപടിയെടുക്കാന്‍ തയാറാകാത്ത പൊലിസ് മുസ്‌ലിംലീഗ് നേതാക്കളുടെയും സമസ്ത പ്രവര്‍ത്തകരുടെയും പേരില്‍ കള്ളക്കേസെടുത്ത് ജയിലിലടക്കാന്‍ ശ്രമം നടക്കുന്നതായി സൂചന. സംഭവം നടക്കുമ്പോള്‍ സ്ഥലത്തില്ലാതിരുന്ന പഞ്ചായത്ത് മുസ്‌ലിം ലീഗ് ജനറല്‍ സെക്രട്ടറിയുള്‍പ്പെടെ എഴുപതോളം പേര്‍ക്കെതിരെ ജാമ്യമില്ലാ കേസെടുത്തതായാണ് വിവരം. ഇരു വിഭാഗക്കാരും ഉള്‍പ്പെടെ ആയിരത്തോളം പേര്‍ക്കെതിരെ പൊലിസ് നേരത്തെ കേസെടുത്തിട്ടുണ്ട്. കഴിഞ്ഞ ബുധനാഴ്ചയാണ് മഗ്‌രിബ് നിസ്‌കാരം തുടങ്ങവെ കാന്തപുരം വിഭാഗക്കാരായ ഗുണ്ടാ സംഘം പള്ളിയില്‍ ഇരച്ചുകയറി അക്രമം അഴിച്ചുവിട്ടത്. ഹൈകോടതി വിധി പ്രകാരം സമസ്തക്ക് ലഭിച്ച പള്ളി പിടിച്ചെടുക്കാന്‍ കഴിയില്ലായെന്ന് ഉറപ്പായതോടെയാണ് പള്ളിയില്‍ കയറി സമസ്ത പ്രവര്‍ത്തകരെ മാരകായുധങ്ങള്‍ ഉപയോഗിച്ച് ക്രൂരമായി മര്‍ദിച്ചത്. പൊലിസ് അക്രമം നേരില്‍ കണ്ടിട്ടും ഭരണസ്വാധീനത്തിന്റെ മറവില്‍ ഉന്നത രാഷ്ട്രീയ ഇടപെടലിനാല്‍ കാന്തപുരം വിഭാഗത്തിന് വേണ്ടി ലീഗ് നേതാക്കള്‍ക്കും പ്രവര്‍ത്തകര്‍ക്കുമെതിരെ കള്ളക്കേസെടുക്കുകയായിരുന്നു. പള്ളിക്കുള്ളില്‍ കൊലവിളി നടത്തി സമസ്ത പ്രവര്‍ത്തകരെ ക്രൂരമായി മര്‍ദിച്ചവര്‍ക്കെതിരെ കേസെടുക്കാന്‍ പൊലിസ് ഇതുവരെ തയാറായില്ല.