കൊടുങ്ങല്ലൂര്‍: എറിയാട് യുബസാറില്‍ അജ്ഞാത ജീവിയുടെ ആക്രമണം. രണ്ട് ആടുകള്‍ ചത്തു. ആടുകളെ കൊന്നത് തെരുവ് നായ്ക്കളാണെന്ന് സംശയം. യു ബസാര്‍ വടക്കുവശം കൊമ്പനേഴത്ത് മാമതുവിന്റെ വീട്ടിലെ ആടുകളെയാണ് ഞായറാഴ്ച്ച രാത്രിയില്‍ ആക്രമിച്ച് കൊന്നത്.
രാത്രിയില്‍ വീട്ടുകാര്‍ മരണവീട്ടില്‍ പോയിരിക്കുകയായിരുന്നു. രാവിലെ അയല്‍വാസികളാണ് സംഭവം കണ്ടത്.
കൂട്ടില്‍ കെട്ടിയിട്ടിരുന്ന ആടുകളെ കടിച്ചുകീറി മുറ്റത്തേക്ക് വലിച്ചിഴച്ച നിലയിലാണ് കണ്ടെത്തിയത്. വീടിന്റെ മതില്‍ കെട്ടിനകത്ത് നിന്നും രാത്രി നായ്ക്കളുടെ കുര കേട്ടിരുന്നതായി അയല്‍വാസികള്‍ പറഞ്ഞു.
മാംസാവശിഷ്ടങ്ങളും മറ്റും ഒഴിഞ്ഞ സ്ഥലങ്ങളില്‍ കൊണ്ടുവന്നിടുന്നത് മൂലം ഈ പ്രദേശത്ത് തെരുവ് നായ്ക്കളുടെ ശല്യം ഏറെയാണ്.