ലണ്ടന്‍: ടാക്‌സ് റിട്ടേണ്‍ സമര്‍പ്പിക്കാന്‍ വൈകിയാല്‍ പിന്നെ കാരണം ബോധിപ്പിക്കണമല്ലോ. ബ്രിട്ടീഷിലെ ഒരാള്‍ നല്‍കിയ കാരണം ബോധിപ്പിക്കല്‍ വൈറലാവുകയാണ്.

'ഭാര്യയാണ് തന്റെ ടാക്‌സ് കണക്കുകള്‍ നോക്കുന്നത്. പത്തു ദിവസമായി ഭാര്യയ്ക്ക് തലവേദനയാണ്'- ഇതായിരുന്നു കാരണം. കാരണം ശക്തമല്ലാത്തതിനാല്‍ ഇയാള്‍ക്കെതിരെ പിഴ ശിക്ഷയിട്ടു.

ഇങ്ങനെ നിരവധി കാരണങ്ങളാണ് ബ്രിട്ടീഷ് റെവന്യൂ ആന്റ് കസ്റ്റംസ് ഓഫിസില്‍ ലഭിച്ചത്. പോസ്റ്റ്മാന്‍ വീട്ടില്‍ എത്തുന്നില്ലെന്നാണ് മറ്റൊരാളുടെ കാരണം.

''ടാക്‌സ് റിട്ടേണ്‍ തന്റെ വഞ്ചിയിലായിരുന്നു. ബോട്ട് കത്തിപ്പോയി''- മറ്റൊരു കാരണം.

''ഒരു പ്രാണി കാരണം തന്റെ കാര്‍ അപകടത്തില്‍പ്പെട്ടു. കാറിനുള്ളിലുണ്ടായിരുന്ന ടാക്‌സ് റിട്ടേണ്‍ നശിച്ചുപോയി''- ഇങ്ങനെ നീളുന്നു പിഴ ശിക്ഷയില്‍ നിന്ന് ഒഴിവാകാനുള്ള കാരണം നിരത്തലുകള്‍.