കാസര്‍കോട്: പുതിയ മലയാള സിനിമകള്‍ പെന്‍ഡ്രൈവിലും മൊബൈല്‍ ഫോണിലും മറ്റും പകര്‍ത്തി നല്‍കുന്ന  രണ്ടു പേരെ കാസര്‍കോട് പൊലിസ് അറസ്റ്റ് ചെയ്തു. ബദിയടുക്ക നെക്രാജെയിലെ കെ ഹംസ (25), ഉളിയത്തടുക്ക നാഷനല്‍ നഗറിലെ അബ്ദുല്‍ ജലീല്‍ (24) എന്നിവരെയാണ് കഴിഞ്ഞ ദിവസം പ്രിന്‍സിപ്പല്‍ എസ്.ഐ അജിത് കുമാറിന്റെ നേതൃത്വത്തില്‍ അറസ്റ്റു ചെയ്തത്.
നഗരത്തിലെ ചില കടകള്‍ കേന്ദ്രീകരിച്ച് പുതിയ സിനിമകള്‍ പെന്‍ഡ്രൈവുകളിലും മൊബൈല്‍ ഫോണുകളിലും പകര്‍ത്തി നല്‍കുന്നുണ്ടെന്ന രഹസ്യവിവരത്തിന്റെ അടിസ്ഥാനത്തിലാണ് പൊലിസ് സംഘം വേഷം മാറി പുതിയ ബസ് സ്റ്റാന്റിലെ പള്‍സ്, സാഫ് കമ്യൂണിക്കേഷന്‍സ് കടകളില്‍ എത്തിയത്. പെന്‍ഡ്രൈവുകള്‍ നല്‍കി പുതിയ സിനിമ പകര്‍ത്തി തരണമെന്ന് ജീവനക്കാരോട് ആവശ്യപ്പെട്ടു. പൊലിസാണെന്നറിയാതെ ഇവര്‍ പകര്‍ത്തുന്നതിനിടെ   അറസ്റ്റുചെയ്യുകയായിരുന്നു. രണ്ട് കടകളില്‍ നിന്നും രണ്ട് കംപ്യൂട്ടര്‍, രണ്ട് ഹാര്‍ഡ് ഡിസ്‌കുകള്‍ എന്നിവ പിടിച്ചെടുത്തു.  എസ്.ഐ കെ അമ്പാടി, എ.എസ്.ഐ സി പ്രദീപ് കുമാര്‍ എന്നിവരും സംഘത്തിലുണ്ടായിരുന്നു. പ്രതികള്‍ക്കെതിരെ കോപ്പി ആക്ട് പ്രകാരം കേസെടുത്തു.