തേഞ്ഞിപ്പലം: ദക്ഷിണ മേഖലാ അന്തര്‍ സര്‍വകലാശാലാ വനിതാ വോളിബോള്‍ ചാംപ്യന്‍ഷിപ്പിനു നാളെ കാലിക്കറ്റ് സര്‍വകലാശാലാ സ്റ്റേഡിയത്തില്‍ തുടക്കമാകും. ദക്ഷിണേന്ത്യയില്‍ നിന്നുള്ള 66 സര്‍വകലാശാലകള്‍ മത്സരിക്കും. ഒരു ഇന്‍ഡോര്‍, രണ്ട് ഔട്ട് ഡോര്‍ കോര്‍ട്ടുകളിലായി രാവിലെയും രാത്രിയും മത്സരങ്ങള്‍ നടക്കും. നാളെയും 25നും പ്രാഥമിക റൗണ്ട് മത്സരങ്ങളും, 27, 28 തിയതികളില്‍ ക്വാര്‍ട്ടര്‍ ഫൈനല്‍, ഫൈനല്‍ മത്സരങ്ങളുമാണ് നടക്കുക. പ്രാഥമിക റൗണ്ട് നോക്കൗട്ട് അടിസ്ഥാനത്തിലും ഫൈനല്‍ റൗണ്ട് ലീഗ് അടിസ്ഥാനത്തിലുമായിരിക്കും. നിലവിലെ ആദ്യ നാലു സ്ഥാനക്കാരായ കാലിക്കറ്റ്, എം.ജി, ഹിന്ദുസ്ഥാന്‍, മദ്രാസ് സര്‍വകലാശാലകള്‍ ക്വാര്‍ട്ടറില്‍ നേരിട്ടു മത്സരിക്കും. ഈ ചാംപ്യന്‍ഷിപ്പിലെ ആദ്യ നാലു സ്ഥാനക്കാര്‍ അഖിലേന്ത്യാ അന്തര്‍ സര്‍വകലാശാലാ ചാംപ്യന്‍ഷിപ്പിലേക്ക് യോഗ്യത നേടും. ഉദ്ഘാടനം വൈകിട്ട് നാലു മണിക്ക് വൈസ് ചാന്‍സലര്‍ ഡോ. കെ മുഹമ്മദ് ബഷീര്‍ നിര്‍വഹിക്കും.