കൊളംബോ: ശ്രീലങ്കയെ പരാജയപ്പെടുത്തി ഏഷ്യ കപ്പ് അണ്ടര്‍ 19 ക്രിക്കറ്റ് കിരീടം ഇന്ത്യ സ്വന്തമാക്കി. ഫൈനലില്‍ ആതിഥേയര്‍ കൂടിയായ ലങ്കയെ 34 റണ്‍സിനു പരാജയപ്പെടുത്തിയാണ് ഇന്ത്യ കിരീടം നേടിയത്. ആദ്യം ബാറ്റു ചെയ്ത ഇന്ത്യ 50 ഓവറില്‍ എട്ടു വിക്കറ്റ് നഷ്ടത്തില്‍ 273 റണ്‍സെടുത്തപ്പോള്‍ ശ്രീലങ്കയുടെ പോരാട്ടം 48.4 ഓവറില്‍ 239 റണ്‍സില്‍ അവസാനിച്ചു.
നാലു വിക്കറ്റെടുത്ത അഭിഷേക് ശര്‍മയുടേയും മൂന്നു വിക്കറ്റ് വീഴ്ത്തിയ രാഹുല്‍ ചഹറിന്റേയും മികച്ച ബൗളിങാണ് ഇന്ത്യക്ക് വിജയം സമ്മാനിച്ചത്. നേരത്തെ ഹിമാന്‍ഷു റാണ (71), ശുഭ്മാന്‍ ഗില്‍ (70) എന്നിവരുടെ മികച്ച ബാറ്റിങാണ് ഇന്ത്യക്ക് പൊരുതാവുന്ന സ്‌കോര്‍ സമ്മാനിച്ചത്.