അങ്കമാലി: കേരളാ പൊലിസിന്റെ ശുഭയാത്രാ  പദ്ധതിയോടനുബന്ധിച്ച്  അങ്കമാലി ജനമൈത്രി പൊലിസിന്റെയും സ്റ്റുഡന്റ്‌സ് പൊലിസ് കേഡറ്റ്‌സിന്റെയും ആഭിമുഖ്യത്തില്‍ ഇന്നലെ അങ്കമാലിയില്‍ ട്രാഫിക് ബോധവല്‍കരണ പരിപാടി നടത്തി. ക്രിസ്തുമസ്പുതുവത്സര വേളയില്‍ വാഹനാപകടം ഉണ്ടാകാതിരിക്കുവാനുളള മുന്‍കരുതലായിട്ടാണ് പരിപാടി നടത്തിയത്.
ഹെല്‍മെറ്റില്ലാതെ വന്ന ഇരുചക്ര വാഹന യാത്രക്കാരെയും, സീറ്റ് ബെല്‍റ്റ് ധരിക്കാതെ വന്ന കാര്‍ ഡ്രൈവര്‍മാരേയും പൊലിസിന്റെ സാന്നിധ്യത്തില്‍  സ്റ്റുഡന്റ്‌സ് പൊലിസ് കേഡറ്റുകള്‍ കൈ കാണിച്ചു നിറുത്തി നിറുത്തി ഉപദേശിച്ചും ഹെല്‍മെറ്റ് ധരിച്ചു വന്ന ഇരുചക്ര വാഹന യാത്രക്കാര്‍ക്കും, സീറ്റ് ബെല്‍റ്റ് ധരിച്ചു വന്ന കാര്‍ ഡ്രൈവര്‍മാര്‍ക്കും മിഠായി വിതരണം നടത്തുകയും ചെയ്തു. കറുകുറ്റി സ്റ്റാര്‍ ജീസസ്, കിടങ്ങൂര്‍ സെന്റ് ജോസഫ്‌സ് സ്‌കൂള്‍, മൂക്കന്നൂര്‍ എസ്.എച്ച്.ഒ.എസ് സ്‌കൂളിലേയും മുഴുവന്‍  സ്റ്റുഡന്റ്‌സ് പൊലിസ് കേഡറ്റ്‌സും പങ്കെടുത്തു. വാഹനാപകടങ്ങള്‍ കുറയ്ക്കുന്നതിന് സംസ്ഥാന ഗവര്‍മെന്റ്് ആവിഷ്‌കരിച്ചിട്ടുളള പദ്ധതികളുടെ ഭാഗമായിട്ടാണ് പരിപാടി നടത്തിയത്. പദ്ദതിയുടെ  ഉദ്ഘാടനം ആലുവ ഡിവൈ.എസ.്പി കെ.ജി.ബാബുകുമാര്‍ നിര്‍വഹിച്ചു.
അങ്കമാലി സര്‍ക്കിള്‍ ഇന്‍സ്‌പെക്ടര്‍ എസ്.മുഹമ്മദ് റിയാസ് ,അങ്കമാലി സബ് ഇന്‍സ്‌പെക്ടര്‍ പി.എച്ഛ് സമീഷ്, എസ്.ഐ മൊയ്തീന്‍കുഞ്ഞ്, അങ്കമാലി പൊലീസ് സ്റ്റേഷനിലെ മറ്റു പൊലീസുദ്യോഗസ്ഥര്‍, സ്റ്റുഡന്റ്‌സ് പൊലീസ് കേഡറ്റ്‌സ് ഇന്‍സ്റ്റ്രക്റ്റര്‍മാരായ സക്കറിയ, ജോണ്‍സണ്‍, സിജു, റീന തോംസണ്‍, ബെറ്റ്‌സി എന്നിവര്‍ നേതൃത്വം കൊടുത്തു.