ചെര്‍ക്കള: അരമങ്ങാനത്തും ചെര്‍ക്കളയിലും വീടുകള്‍ കുത്തിത്തുറന്നു സ്വര്‍ണവും പണവും കവര്‍ന്നു. ഉദുമ അരമങ്ങാനത്തെ അബ്ദുല്ലയുടെ വീട്ടില്‍ നിന്ന് അഞ്ചു പവന്‍ സ്വര്‍ണവും 32,000 രൂപയും ചെര്‍ക്കളയിലെ ബീവിയുടെ വീട്ടില്‍ നിന്ന് ഒരു പവന്‍ സ്വര്‍ണവും 5,000 രൂപയും വാച്ച്, സ്റ്റബിലൈസര്‍, ടാബ് എന്നിവയുമാണു മോഷണം പോയത്. അബ്ദുല്ലയും കുടുംബവും കഴിഞ്ഞ ദിവസം സമീപത്തെ പള്ളിയില്‍ മതപ്രസംഗം കേള്‍ക്കാര്‍ പോയി 12 മണിയോടെ തിരിച്ചെത്തിയപ്പോഴാണു മോഷണം നടന്നതായി അറിഞ്ഞത്.
ബേക്കല്‍ പൊലിസും വിരലടയാള വിദഗ്ധരും ഡോഗ് സ്‌ക്വാഡും വീട്ടില്‍ പരിശോധന നടത്തി.
ചെര്‍ക്കളയിലെ ബീവിയുടെ വീടിന്റെ അടുക്കള ഭാഗത്തെ വാതില്‍ തകര്‍ത്താണു മോഷ്ടാക്കള്‍ അകത്തു കടന്നത്. വീട്ടുകാര്‍ ഈ മാസം അഞ്ചിനു വീട് പൂട്ടി ബന്ധുവീട്ടില്‍ പോയതായിരുന്നു.കഴിഞ്ഞ ദിവസം തിരിച്ചെത്തിയപ്പോഴാണ് കവര്‍ച്ച ശ്രദ്ധയില്‍ പെട്ടത്