കൊച്ചി: ഏകസിവില്‍ കോഡ് എന്ന ആശയം നല്ലതാണെങ്കിലും മുസ്‌ലിംകളെ മാത്രം കേന്ദ്രീകരിച്ചുള്ള മോദി സര്‍ക്കാരിന്റെ നീക്കം തെറ്റെന്ന് എന്‍.എഫ്.ഐ.ഡബ്‌ള്യു ജനറല്‍ സെക്രട്ടറി ആനിരാജ വാര്‍ത്താസമ്മേളനത്തില്‍ പറഞ്ഞു.
നോട്ട് നിരോധനത്തെ തുടര്‍ന്ന് ബുദ്ധിമുട്ടിലായ സ്ത്രീകളുടെ സ്വയംസഹായ സംഘങ്ങള്‍ ബാങ്കില്‍ നിന്നെടുത്ത വായ്പകള്‍ എഴുത്തിത്തള്ളാന്‍ നടപടി സ്വീകരിക്കണം. നോട്ട് അസാധുവാക്കലിനെ തുടര്‍ന്ന് ഏറെ ദുരിതമനുഭവിക്കുന്നത് താഴേത്തട്ടിലുള്ള ദിവസവേതനക്കാരായ സ്ത്രീകളാണ്. ഇവര്‍ക്ക് നിരവധി തൊഴില്‍ ദിനങ്ങള്‍ നഷ്ടമായിട്ടുണ്ട്. വിജയ് മല്യയെപ്പോലുള്ളവരുടെ കിട്ടാക്കടങ്ങളായ കോടികള്‍ കേന്ദ്രം എഴുത്തിത്തള്ളുമ്പോള്‍ ഈ സ്ത്രീകളുടെ തുച്ഛമായ കടങ്ങള്‍ എന്തുകൊണ്ട് എഴുതിത്തള്ളിക്കൂടായെന്ന് ആനിരാജ ചോദിച്ചു. വാര്‍ത്താസമ്മേളനത്തില്‍ കേരള മഹിളാസംഘം സംസ്ഥാന പ്രസിഡന്റ് കമലാസദാനന്ദന്‍, ജില്ലാ പ്രസിന്റ് മല്ലികാസ്റ്റാലിന്‍, സെക്രട്ടറി എസ.് ശ്രീകുമാരി സജിനി തമ്പി എന്നിവരും പങ്കെടുത്തു.